Риштонда 1000 дан ортиқ хонадон эгалари ариқ сувини ичишга мажбур бўлмоқда. Бу ҳақда «Дарё» мухбири Азиз Эрматов маълум қилди.
Тумандаги Тўқай, Четмозор, Қаҳрамон, Қум, Оқтомир маҳаллаларида яшовчи аҳоли ва мактаб ўқувчилари тоза ичимлик суви йўқлиги учун йиллар давомида ариқ сувини истеъмол қилиб келмоқда. «Оқтомир» маҳалла фуқаролар йиғинидан олинган маълумотга кўра, фуқаролар йиғини таркибидаги 18 та кўча, 713 хонадон ва 2 та мактаб тоза ичимлик сувига муҳтож.
«65 ёшга кирдим. Тўқай, Четмозор, Қаҳрамон, Қум, Оқтомир маҳаллаларида ичимлик суви йўқ, фақат мана шу ҳовуз бор. Ҳовуздаги сувни тиндириб ичяпмиз. Бошқа сув йўқ. Умуман қўл ювишга ҳам яроқсиз аслида бу сув. Лекин мажбурмиз уни ичишга. Бу масалада ёрдам сўраб бормаган жойим қолмади. Туман ҳокимининг қабулига неча марта кирдим. Натижа йўқ. Яқинда ишчи гуруҳи келиб, ўрганди. Эски сув тармоғи ўрнини ковлаб кетишди. Беш-ўн кун кутдик. Ўзгариш бўлмади. Кейин ёш болалар чуқурга тушиб кетмасин деб ўзимиз қайтадан кўмиб қўйдик,» – дейди Фаровонлик кўчаси, 7-уйда яшовчи Бакир Пўлатов.
«Ҳар уч-тўрт кунда сувни чиқариб ташлаб, ҳовузни тозалаб тураман. Бу шу атрофдаги энг яхши ҳовуз. Бошқа ҳовузлардаги сувнинг сифати бундан ҳам ёмон. Машинам борлиги учун бошқа қишлоқдан тоза ичимлик суви олиб келаман. Транспорти йўқ қўшниларимиз эса шу сувдан ичишга мажбур. Тоза ичимлик суви бор энг яқин қишлоқ ҳам 5 – 6 километр масофада жойлашган,» – дейди шу кўчада яшовчи Абдусалом Ҳайдаров.
Маҳалладаги ҳар бир кўчада мана шундай ҳовузлар бор. Катта Фарғона каналидан насослар ёрдамида олинган сув маҳаллий ариқларга тушади. Йўл-йўлакай бу сув фермер хўжаликларининг далаларидан ўтади (энг ачинарлиси, унга қишлоқ хўжалигида қайта ишланган оқава сувлар, турли минерал ўғитлар аралашади) ва аҳоли томонидан ковланган махсус ҳовузда тўпланади. Сув тиндирилгач, истеъмол қилинади.
Бу сув истеъмолга яроқлими? Унинг инсон саломатлигига хавфи йўқми? Шу саволлар билан туман давлат санитария-эпидемиология назорати маркази раҳбарига мурожаат қилдик.
«Нафақат бу ҳовуздаги, балки барча очиқ сув ҳавзаларидаги сув ичиш учун яроқсиз ҳисобланади. Чунки уларнинг таркибида турли касаллик қўзғатувчи воситалар бўлиши мумкин. Биз бу бўйича аҳолига тушунтирганмиз. Қолаверса, бу ҳудудга жадвал асосида махсус машиналарда тоза ичимлик суви тарқатилади. Ҳозир аҳоли шу сувдан истеъмол қилади, ҳовуздан эмас. Охирги икки йил ичида туманимизда тоза ичимлик суви бўйича жуда катта ўзгаришлар бўлди. Тоза ичимлик суви етиб бормаган маҳаллалар деярли қолмади. Оқтомирга ҳам дастур асосида сув тармоғи тортиш ишлари бошланган. Тез кунда сув чиқади у ерда ҳам,» – дейди туман давлат санитария эпидемиология назорати маркази раҳбари Иномжон Юнусов.
Оқтомирликларнинг айтишича, муаммонинг ечими кўп маблағ ва меҳнат талаб қилмайди. Чунки аксар кўчаларга илгари сув тармоғи тортилган. Фақат сифатсиз қувурлар кўмилгани учун улар бир марта сув келиши билан ёрилиб кетган. Сифатсиз қувурларни янгиларига алмаштириш ва уларни тармоққа улаш орқали одамларни йиллар давомида қийнаб келаётган муаммони бир неча кун ичида ҳал қилса бўлади. Бу фикрни мутасаддилар ҳам тасдиқлади.
«Бу муаммодан хабаримиз бор. Тўқай маҳалла ҳудудида сув тармоғи тортилган. Фақат ишламаган. Уларни янгисига алмаштириш керак. Ҳозир қазиш ишларини бошладик. Вилоятдан қувурлар ажратилса, олиб келиб ўрнатамиз. Бир-икки кунда бу маҳаллаларга сув келишни бошлайди,» – дейди туман «Сувоқава» давлат унитар корхонаси бош муҳандиси Маъруфжон Мавлонов.
Орадан уч кун ўтиб, вазиятга ойдинлик киритиш мақсадида биз маҳаллий аҳоли вакиллари билан телефон орқали боғландик. Уларнинг айтишича, ишлар ўша ҳолида ташлаб қўйилган, ҳанузгача ваъда қилинган қувурлар келтирилмаган...
Изоҳ (0)