Қўқон шаҳридаги Шиғовул кўчаси, 11-уйда яшовчи Маъмурахон Баратованинг бошидан кўп қийинчиликлар кечди. Бу ҳақда ЎзА хабар бермоқда.
У олий ўқув юртини тамомлаб, 9 йил мактабда ўқитувчи бўлиб ишлади. Ўша йилда дадаси ҳам оламдан ўтди. Онаси 1987 йилдан асаб тизимидаги ўзгаришлар туфайли оғир хасталаниб қолди. Шундан кейин онасининг парвариши ва саломатлигига қараш унга қолди. Оила қурмади, яхши ишини ташлашга мажбур бўлди. Аммо у бундан афсусланмайди. Яқинларга меҳрибонлик, самимият ва онани эъзозлаш ҳар икки дунёсини обод қилишга тенг.
Аксига олиб Маъмурахон Баратова 6 йилдан буён ревматизм ва остеохондроз касалликлари билан оғримоқда.
— Қийналиб қоллмаяпсизми, ёлғизликда? Моддий яшаш қандай? — сўраймиз онахоннинг кўнглига қўл солиб.
— Очиғи, пенсиям 168 минг сўм.
— Жуда кам эмасми?
— Пенсия учун стажим етарли бўлмагани сабабли шундай кам чиқиб қолди. Озликка озку, аммо эплаяпман, — дейди Маъмурахон опа хижолат бўлиб. —Уни олган заҳотим биринчи галда чироқ ва газ ҳақига ажратаман. Ҳеч кимим йўқ. Синглимнинг фарзандлари ҳар замонда бир хабар олиб туришади. Ўзим II-гуруҳ ногирониман. Оёғим қаттиқ оғрийди. Муолажага имконим йўқ. Таблеткалар ичиб юраман.
Маҳаллаларда ва оилаларда ижтимоий-маънавий муҳитни ўрганиш ҳамда аниқланган муаммоларни бартараф этишга кўмаклашиш бўйича Республика ишчи гуруҳи ўрганишидан кейин моддий ёрдам кўрсатиш учун маҳалла фуқаролар йиғини тегишли комиссиясига тавсия берилди. Бундан ташқари, Фарғона вилояти ҳокимлиги ва соғлиқни сақлаш бошқармаси томонидан 25 апрелдан бошлаб 10 кун мобайнида санаторияда дам олиш бўйича ордер тақдим этилди.
Бюджетдан ташқари пенсия жамғармасига эса ҳеч бир қолипга сиғмайдиган, ҳатто энг кам ойлик иш ҳақидан ҳам кам бўлган пенсияни қайта кўриб чиқиш ва ногиронлик нафақаси масалани ҳал қилишга кўрсатма берилди.
Изоҳ (0)