Ташқи савдо вазирлигида Латвия Сейми раиси Инара Мурниеце бошчилигидаги Латвия делегацияси билан учрашув ўтказилди. Бу ҳақда вазирлик ахборот хизмати хабар берди.
Латвия транспорт-логистика соҳасидаги ҳамкорликни ривожлантиришга катта эътибор беради. Шу муносабат билан Латвия делегацияси томонидан икки мамлакат пойтахтлари ўртасида авиапарвозлар сонини кўпайтириш масаласини кўриб чиқиш таклиф этилди. Ўз навбатида, ўзбек томони юк ташиш тарифлари, жумладан, темир йўл транспорти орқали ташиш учун чегирмалар тақдим этиш масаласини кўриб чиқишни таклиф қилди.
Иқтисодий, саноат ва илмий-техникавий ҳамкорлик бўйича икки томонлама ҳукуматлараро комиссия мажлисидан олдин саволларни кўриб чиқиш мақсадга мувофиқлиги таъкидланди. Латвия томони комиссиянинг келгусидаги мажлиси тартибини мамлакат атроф-муҳитни муҳофаза қилиш ва минтақавий ривожланиш вазири К. Герхардснинг Ўзбекистонга ташрифи доирасида муҳокама қилиниши ҳақида маълумот берди. Латвия парламенти аъзолари ҳукуматлараро музокаралардан ташқари икки мамлакат ишбилармон доираларининг тўғридан-тўғри алоқаларни ўрнатишга имкон берувчи Ўзбекистон — Латвия бизнес-кенгашини ташкил этишни таклиф қилди.
Учрашув доирасида Латвия делегацияси Ўзбекистоннинг Болтиқбўйи минтақасида савдо-иқтисодий манфаатларини илгари суришга тайёр эканини таъкидлади. Хусусан, айрим масалаларни муҳокама қилиш учун Латвия фаол иштирок этадиган «Шимолий Болтиқбўйи саккизлиги» майдонидан фойдаланиш таклиф этилди.
Учрашув доирасида Латвия томонидан Фарғонада «Туризм, меҳмонхона ва ресторан хизматлари» йўналиши бўйича Ахборот тизимлари менежменти олий мактаби филиалини очиш, шунингдек, электрон ҳукумат ва яшил технологиялар соҳаларида ҳамкорлик қилишда қизиқиш билдирилди.
Изоҳ (0)