Фарғона вилоятининг Қувасой шаҳрида «Исфайрам қурилиш» масъулияти чекланган жамияти томонидан 1 гектар майдонда гидропоника усулида иссиқхона ташкил этилди. Бу ҳақда «Дарё» мухбири хабар берди.
Иссиқхонага Жанубий Кореядан 300 минг долларлик технология олиб келиб, ўрнатилди. Унинг қурилишига 1 миллиард сўм маблағ сарфланди. Айни пайтда бу ерда гидропоника усулида «Донотино» навли 21 минг дона помидор кўчатлари парваришланяпти. Тез кунларда 150 тоннага яқин маҳсулот Россияга экспорт қилиниши режалаштирилган.
Жамият ишчиларининг айтишича, гидропоника типидаги иссиқхонада махсус унумдор ерга зарурат бўлмайди —ўсимликлар сунъий муҳитда тупроқсиз етиштирилади. Тўлиқ автоматлаштирилган назорат тизими билан бошқарилади.
Тежамкор энергия, суғориш ва озиқлантириш тизими мавжуд. Бундай иссиқхоналарда оддийларига нисбатан 2–2,5 баробар кўп ҳосилдорлик кузатилади. Помидорларнинг пишиб етилиш даври 20–30 кунга қисқариши, ҳосил бериш даври эса 50–60 кунга узайиши бу усулнинг яна бир афзаллиги ҳисобланади.
Инновацион технология асосида барпо этилган иссиқхонада йилига тўрт мартагача ҳосил олиш мумкин. Чунки кунлар исиши билан қатор полиз экинлари, хусусан, помидор кўчати ривожланишдан тўхтайди. Янги технологияда ҳаво ҳарорати ўта исиб кетган тақдирда ҳам иссиқхона ичидаги махсус совутиш мосламаси ҳавони мў’тадиллаштириб, кўчатнинг бир маромда ривожланишини таъминлайди. Шу тариқа иссиқхонада сабзавот ва полиз экинларидан йил давомида бир неча марта ҳосил олинади.
Изоҳ (0)