Вазирлар Маҳкамасида бош вазир Абдулла Арипов раҳбарлигида «Ҳудудларда дала ва тозалаш-ободонлаштириш ишларига тиббиёт ва таълим муассасалари ходимлари, талабалар ва ижтимоий соҳа вакилларини жалб қилишни тақиқлаш ва ушбу ҳолатларга йўл қўйган барча даражадаги ҳокимлар ва раҳбарларнинг шахсий масъулият ва жавобгарлигини оширишга қаратилган чораларни белгилаш» масаласига бағишланган видеоселектор йиғилиши бошланди. Бу ҳақда ЎзА хабар бермоқда.
Алоҳида таъкидлаш жоиз, ушбу видеоселектор йиғилиши Ўзбекистон Президенти Шавкат Мирзиёев ташаббуси билан ўтказилди.
Йиғилишда Шавкат Мирзиёев томонидан ижтимоий соҳа ходимлари, хусусан, шифокорлар, ўқитувчилар ва талаба-ёшларни жамоат ишларига жалб қилишнинг олдини олиш, мажбурий меҳнатга тақиқ қўйиш, раҳбар ходимларнинг ҳудудларда кўзбўямачиликка йўл қўйишининг олдини олишга қаратилган топшириқлари ижроси, бу борада аниқ механизмни ишлаб чиқиш ва қатъий назорат ўрнатиш борасидаги ишлар муҳокама этилмоқда.
Йиғилиш асносида бош вазир Самарқанд вилоятидаги мана шундай тадбирда ҳалок бўлган ўқитувчи Дианани эсга олди.
«Президентимиз Сирдарё вилояти фаоллари билан бўлган учрашувда Самарқандда юз берган ўқитувчи фожиасини эслатди. Бунга йўл қўйган раҳбарларни қаттиқ танқид остига олиб, бу каби раҳбарларни иккиюзламачиликда, кўзбўямачиликда айблади. Бундан кейин кимда ким бу каби ишларни амалга оширса жавоб беришини таъкидлади», — деди у.
Изоҳ (0)