Президентнинг вилоятнинг ташрифлари чоғида тақдим этилган турли лойиҳалар чуқур инвентаризациядан ўтказилади. Бу ҳақда Ўзбекистон Президенти матбуот котиби Комил Алламжонов 17 апрель куни бўлиб ўтган брифингда маълум қилди.
Мавзуга доир: Президент маҳаллийлаштиришдаги кўзбўямачилик ҳақида гапирган эди. У — иссиқхоналар, томлар, болалар майдончаларида ҳам бор
Президент ўз нутқида жойлардаги кўзбўямачилик ҳолатларидан ҳам қаттиқ норози эканлигини билдирди. Қайд этилган хўжакўрсин ишлар юзасидан прокурорлик текширувини ўтказиш бўйича кўрсатма берди. Жумладан, Қашқадарёда йўл бўйларида ясалган сохта иссиқхоналар, Жиззахдаги тиббиёт муассасасида эски жиҳозлар ўрнатилгани ва касалларни онлайн рўйхатга олиш дастури ишламаслиги каби ҳолатлар текширилади.Бундан ташқари, Президентнинг Самарқанд вилоятига ташрифи арафасида йўл ўртасидаги тўсиқларни оқлаётган ўқитувчи — Диана Еникееванинг ЙТҲ оқибатида ҳалок бўлгани муносабати билан, Комил Алламжоновнинг маълум қилишича, ҳукумат томонидан энди ўқитувчи ва шифокорларни кўча тозалаш ва бошқа ободонлаштириш ишларига жалб этилишининг олдини олишга қаратилган қарор қабул қилинади.Вилоятларга ташрифлар чоғида кўрсатилган, жумладан, банк раҳбарлари томонидан тақдим этилган лойиҳаларни чуқур ва таҳлилий инвентаризациядан ўтказиш, камчиликлар аниқлангудек бўлса, кескин чоралар кўриш бўйича топшириқлар берилди. Президент яна шундай кўзбўямачилик ҳолатларига йўл қўймаслик мақсадида доимий ва қатъий назорат ўрнатиш зарурлигини таъкидлади. Кўзбўямачиликка уринган ёки бунинг олдини олмаган раҳбарлар қаттиқ жазоланади.
Давлатимиз раҳбари берган топшириқлар ижроси, айбдорларнинг жазоланганлиги ҳақида ОАВ, жумладан, Бош прокуратура ҳузуридаги Медиамарказ орқали хабарлар бериб борилади.
Комил Алламжонов, Ўзбекистон Президенти матбуот котиби
Изоҳ (0)