Қўқон шаҳрининг халқ тилида «Янги бозор» деб аталадиган ҳудудида пиёдалар учун усти ёпиқ янги кўприк қурилди. Бу ҳақда «Дарё» мухбири Азиз Эрматов хабар берди.
Кўприкнинг баландлиги 7 метр, узунлиги 110, эни эса 5 метрни ташкил этади. 5 та чиқиш-тушиш зинасига эга, зиналарнинг ҳар бири 20 метрдан. Фарғона водийсида ягона ҳисобланган ушбу кўприк қурилиши учун 3 миллиард сўм сарфланди. Яқин орада бу ерда 2 та замонавий лифт ўрнатилиши режалаштирилган.
Кўприк қурилган ҳудудда Фарғона водийсидаги энг йирик улгуржи ва чакана савдо мажмуалари жойлашган. Қўқон савдо, «Ризқ-барака», «Истиқлол», «Буюк ипак йўли», Форобий савдо комплексларига Ўзбекистоннинг барча ҳудудларидан тадбиркор ва харидорлар келиши туфайли кўпинча бу ерда аҳоли ва транспорт тирбандлиги кузатилар эди.
Янги кўприк ушбу бозорлар атрофида ҳаракат хавфсизлигини таъминлаш, аҳолига қулайлик яратишга хизмат қилади.
Изоҳ (0)