7 марта судланган қашқадарёлик «фолбин» аёл ва унинг шериги яна фирибгарликка қўл урди
Шарофат Алиева олдин жиноят ишлари бўйича Бухоро шаҳар, Пастдарғом, Тайлоқ, Шаҳрисабз, Қизилтепа, Деҳқонобод ва Косон туман судларининг ҳукми билан судланганди. Бу ҳақда UzNews хабар бермоқда.
Жиноят кодексининг турли моддалари билан бир неча бор судланганига қарамай Қашқадарё вилоятининг Шаҳрисабз шаҳридан бўлган Шарофат Алиева жиноий шериги Гулжаҳон Ғаниева билан биргаликда Янгийўл туманидаги фуқаронинг мулкини қасддан ўзлаштириш мақсадида унинг ишончига кирди. Совчиликни баҳона қилиб, хонадон соҳибларига қизларини бахтини очишини айтиб, уйдаги барча тилла тақинчоқларни ўзлаштирди.
Қизининг бахти боғланганлиги ҳақидаги тахминлари тўғри чиққанлигини билган она «фолбин совчи»ларнинг ҳамма топшириғини сўзсиз бажарди: бирпасда нина, оқ пахта, оқ ип, қора целлофан, 7 дона шағал тош ва 7 дона тилла буюмлар муҳайё қилинди. Замира опа қизининг қаршилигига қарамай, ўзининг, эрининг ва ҳатто келинининг ҳам тилла буюмларини йиғиб келди.
«Совчи» уларга бирма-бир қон сурди, ирим-сиримини қилиб, целлофанга ўраб, 3 соатгача ечмаслик шарти билан белига боғлаб қўйди.
Замира опа шундай хурсанд эдики, ҳатто совчиларнинг хатти-ҳаракатидан ҳайрон бўлаётган қизи Салиманинг саволларига ҳам ҳаммасини уч кундан кейин биласан, деб қўя қолди.
Бу ҳолатга шубҳа билан қараган хонадон эгалари шубҳалари ўринли эканлигини англаб, Янгийўл туман ички ишлар бўлими ходимларини ёрдамга чақирди.
Гулжаҳон Ғаниева Сурхондарё вилоятининг Узун туманида туғилиб ўсган. 5 нафар фарзанднинг онаси бўлса ҳам қайнопасидан «ўрнак» олганми, ҳар ҳолда жиноят ишлари бўйича Гулистон шаҳар ва Деҳқонобод туман судлари томонидан судланиб, тегишли жазога ҳукм қилинганди.
Шарофат Алиева хавфли рецидивист бўла туриб, шериги Гулжаҳон Ғаниева билан олдиндан тил бириктириб, умумий баҳоси 4 миллион сўмлик турли хилдаги 7 дона тилла буюмларни қўлга киритиб, жиноят устида далилий ашёлар билан қўлга олинган. Фирибгар «совчилар»га муносиб жазо тайинланди.
