Тошкент давлат юридик университети коллеж битирувчиларини имтиҳонсиз қабул қилади

Тошкент давлат юридик университети 2020/2021-ўқув йилидан бошлаб Адлия вазирлиги ҳузурида бўлган коллежлар битирувчиларини имтиҳонсиз қабул қилишни бошлайди. Бу ҳақда Ўзбекистон Президентининг «Ўзбекистон Республикаси адлия вазирлиги фаолиятини ривожлантириш чора-тадбирлари тўғрисида»ги қарорига асосланиб Sputnik хабар бермоқда

Номзодлар суҳбатдан ўтиб, бакалавр дастури бўйича 3 йиллик ўқишга қабул қилинади. Энг асосийси — олийгоҳ битирувчиси тақсимлашга асосан уч йил давомида узлуксиз ишлаб бериши талаб этилади.

Бу янгиликлар туфайли юридик коллежларга ўқишга қабул қилиш тартиби ўзгартирилади.

Энди ҳар бир вилоятлар муайян мутахассисликларга бўлган талабларини ҳисобга олган ҳолда Адлия вазирлиги томонидан ажратилган квоталар асосида танлов асосида амалга оширилади.

Бундан ташқари, ТДЮУ янги ўқув йилидан талабаларни магистратурага тест имтиҳонларсиз қабул қилишни бошлайди. Унинг ўрнига ёзма имтиҳон ўтказилади. Бу шартда ўқиш бир йилга узайтирилади. Магистратурага контракт тўлови бўйича квоталар сони 150 га кўпайтирилади.

Шунингдек, университет магистратурасида янги йўналишлар очилди: «Ҳуқуқ ва Бизнес», «Ҳуқуқ ва ахборот технологиялар», «Молиявий-ҳуқуқий мониторинг» ва бошқалар.

Бугунги кунда олийгоҳ бакалавриятда — 5 та, магистратурада 10 та йўналишлар бўйича мутахассислар ўқитилади. Бакалавриятда ўқиш 4 йил, магистратурада 2 йил ташкил қилади.

Эслатиб ўтамиз, имтиёздан фақатгина Адлия вазирлиги тузилмасига кирадиган коллеж битирувчилари фойдаланишлари мумкин. Масалан, 2-сонли Тошкент юридик коллежи битирувчилари ушбу имтиёздан фойдалана олмайди.