Тошкентдаги «Хожа Аҳрор Валий» жомеъ масжидида телефон ўғирлаш ҳолати юз берди. Телефон ўғирланиши акс этган видеоёзув «Azon.uz» таҳририятига тақдим этилган.
«Намоз ўқилаётган пайтда масжидга кириб келган киши қаровсиз қолган телефонни чўнтагига солган ва жамоатга қўшилиб намоз ўқиган. Сўнгра масжиддан чиқиб кетган. Бу шахснинг таҳоратхонадаги ҳаракатлари ҳам кузатилди ва юзини тиниқ кўриш имкони пайдо бўлди. Мухтасар қилиб айтганда, ҳуқуқ-тартибот органиларига арз қилиш ва у одамни жиноий жавобгарликка торттиришга барча асослар етарли», — дейилади интернет-нашр хабарида.
Бироқ, маълум бўлишича, телефоннинг эгаси бошқачароқ йўл тутишга қарор қилган. «Ўша одам ўғирланган телефонини масжидга олиб келиб берса ёки ўзи келишга ҳижолат қилиб, бошқа бировдан бериб юборса ҳам, унинг устидан арз қилинмайди. Агар қайтарилмаса, керакли жойларга ариза билан мурожаат қилинади», — дейилади хабарда.
Аввалроқ Тошкентдаги «Минор» масжиди таҳоратхонасига кириб, ташрифчиларнинг қаровсиз қолдирилган либосларидан бир миллион сўмдан кўпроқ маблағни ўғирлаган шахс 8 йилга озодликдан маҳрум этилгани маълум бўлган эди.
Изоҳ (0)