Ўзбекистон Республикаси Қуролли Кучлар академиясининг Чирчиқ шаҳридаги дала-ўқув майдонида курсантларнинг навбатдаги тактик ўқув машғулоти бўлиб ўтди. Бу ҳақда ЎзА хабар бермоқда.
Ёш ҳарбийларнинг жанговар шайлигини ошириш, ҳарбий хизматчиларнинг ҳарбий ҳаракатлар вақтидаги тажриба ва маҳорати, мураккаб шароитларда ностандарт қарорлар қабул қилиш кўникмасини юксалтириш мақсадида ташкил этилган машғулотларда жанговар қурол-яроғ ва ҳарбий техникалардан самарали фойдаланиш, ҳарбий хизматчиларнинг бу борадаги билим ва малакасини янада такомиллаштиришга алоҳида эътибор қаратилди.
Тажрибали офицер ва йўриқчилар иштирокида курсантлар ҳудудни ўрганиш, ҳимоя позицияларини эгаллаш, ҳарбий техникалардан қисқа фурсатда тўғри фойдаланиш бўйича ўз маҳоратини синовдан ўтказди.
«Ёш ҳарбийлар ўз вазифаси бўйича белгиланган топшириқларни аъло даражада бажарганини алоҳида таъкидлаш лозим. Бу жараёнда улар, айниқса, танкка қарши бошқарилувчи ракета қурилмасидан нишонга ўқ отиш бўйича билим ва кўникмасини янада оширди. Машғулотларга раҳбарлик қилган Қуролли Кучлар академияси қуролланиш ва отиш кафедраси бошлиғи подполковник Р.Аҳмадалиев курсантларга ютуқ ва камчиликларини айтиб, тегишли кўрсатмалар берди», — дейилади хабарда.
Изоҳ (0)