Соҳибқирон Амир Темур таваллудининг 682 йиллиги муносабати билан Қашқадарё вилоят ҳокимлиги ва Халқаро пресс-клуб ҳомийлигида Китоб туманидаги Варганза халқ кутубхонаси ташкил этилди. Бу ҳақда Халқаро пресс-клуб матбуот хизмати хабар бермоқда.
Кутубхона учун китоб йиғиш акцияси Халқаро пресс-клуб ташаббуси билан ташкил этилди. Хайрли ташаббус натижасида Халқаро пресс-клуб фондида ўзбек, рус, инглиз ва тожик тилларидаги 2 мингдан зиёд китоб йиғилди.
«Кутубхона очилиш маросимида сўзга чиққан Қашқадарё вилояти ҳокими Зафар Рўзиев, Халқаро пресс-клуб раиси Шерзодхон Қудратхўжаев мазкур кутубхона ёш авлоднинг баркамол топишига хизмат қилишига ишонч билдирди», — дейилади хабарда.
Шунингдек, вилоят ҳокими кутубхонага яна 5 минг китоб ҳадя қилиш таклифини билдирди. Варганза қишлоғи тоғли ҳудудда жойлашган. Шу сабаб бу ерда интернетдан фойдаланиш бироз мушкул. Яқин кунларда Варганзада Beeline компанияси алоқа воситалари ўрнатилади. Натижада кутубхонада ёшлар ўзларига керакли ахборотни олишлари учун Wi-Fi хизматидан фойдаланиш имконига эга бўлади.
«Китобларни совға қилиш осон, аммо улардан унумли фойдаланиш зарур. Бир сонияга ҳам бўш қолманг. Биз миллий қаҳрамонларимиз кимлигини билишимиз зарур. Бу китобларни ўқиб, қаҳрамонлар билан суҳбатлашиб, шунда ҳаёт қадрига, инсоний туйғулар қадрига етамиз. Китоб ўқиган киши ҳеч қачон йўлдан адашмайди. Ватанга содиқ хизмат қилади», – дейди Халқаро пресс-клуб раиси Шерзодхон Қудратхўжаев.
Варганза қишлоғидаги кутубхона очилишидан сўнг Халқаро пресс-клуб ҳамроҳлигидаги журналистлар Ҳазрати Бешир зиёратгоҳида бўлди.
Изоҳ (0)