Sohibqiron Amir Temur tavalludining 682 yilligi munosabati bilan Qashqadaryo viloyat hokimligi va Xalqaro press-klub homiyligida Kitob tumanidagi Varganza xalq kutubxonasi tashkil etildi. Bu haqda Xalqaro press-klub matbuot xizmati xabar bermoqda.
Kutubxona uchun kitob yig‘ish aksiyasi Xalqaro press-klub tashabbusi bilan tashkil etildi. Xayrli tashabbus natijasida Xalqaro press-klub fondida o‘zbek, rus, ingliz va tojik tillaridagi 2 mingdan ziyod kitob yig‘ildi.
“Kutubxona ochilish marosimida so‘zga chiqqan Qashqadaryo viloyati hokimi Zafar Ro‘ziyev, Xalqaro press-klub raisi Sherzodxon Qudratxo‘jayev mazkur kutubxona yosh avlodning barkamol topishiga xizmat qilishiga ishonch bildirdi”, — deyiladi xabarda.
Shuningdek, viloyat hokimi kutubxonaga yana 5 ming kitob hadya qilish taklifini bildirdi. Varganza qishlog‘i tog‘li hududda joylashgan. Shu sabab bu yerda internetdan foydalanish biroz mushkul. Yaqin kunlarda Varganzada Beeline kompaniyasi aloqa vositalari o‘rnatiladi. Natijada kutubxonada yoshlar o‘zlariga kerakli axborotni olishlari uchun Wi-Fi xizmatidan foydalanish imkoniga ega bo‘ladi.
“Kitoblarni sovg‘a qilish oson, ammo ulardan unumli foydalanish zarur. Bir soniyaga ham bo‘sh qolmang. Biz milliy qahramonlarimiz kimligini bilishimiz zarur. Bu kitoblarni o‘qib, qahramonlar bilan suhbatlashib, shunda hayot qadriga, insoniy tuyg‘ular qadriga yetamiz. Kitob o‘qigan kishi hech qachon yo‘ldan adashmaydi. Vatanga sodiq xizmat qiladi”, – deydi Xalqaro press-klub raisi Sherzodxon Qudratxo‘jayev.
Varganza qishlog‘idagi kutubxona ochilishidan so‘ng Xalqaro press-klub hamrohligidagi jurnalistlar Hazrati Beshir ziyoratgohida bo‘ldi.
Izoh (0)