Ўзбекистонда қарздорлиги бўлган шахсларнинг чет элга чиқиши чекланиши мумкин

1 майдан бошлаб Ўзбекистонда энергетика ресурслари, сув таъминоти ва канализация хизматлари, шунингдек, ижро ҳужжатлари бўйича қарздорларнинг умумий маълумотлар базаси жорий этилади, деб ёзади «Газета.uz». Кузгача Бош прокуратура ҳузуридаги Мажбурий ижро бюроси ижро ҳужжатлари бўйича қарзларни мусодара қилиш бўйича ягона идоралараро ҳамкорлик тизимини ишга тушириши керак.

Маълумотлар базасига киритилган қарздорлар — жисмоний ва юридик шахслар йирик олди-сотдиларни амалга ошира олмайди, молия-кредит хизматлари, халқаро йўловчи ташиш хизматлари, шунингдек, давлат хизматларининг муайян турларидан фойдалана олмайди.

Жамоатчилик муҳокамаси учун эълон қилинган Вазирлар Маҳкамаси қарори лойиҳасида маълумотлар базасига кимларни киритиш ва уларни қандай хизматлардан вақтинчалик маҳрум қилиш режалаштирилаётганини кўриш мумкин.

Базага энергетика ресурслари, сув таъминоти ва канализация хизматлари, шунингдек, ижро ҳужжатлари бўйича жисмоний шахслар учун энг кам ойлик иш ҳақининг 2 баробари, юридик шахслар учун — 5 баробаридан ортиқ қарздорлиги бўлган қарздорларни киритиш кўзда тутилмоқда.

Йирик олди-сотди деганда нотариал тасдиқланишни ва давлат рўйхатидан ўтказилишни талаб этадиган олди-сотдилар назарда тутилади.

Қарздорлиги бўлган жисмоний ва юридик шахсларга банк хизматлари, суғурта хизматлари кўрсатилишини, шунингдек, халқаро йўловчи транспортида Ўзбекистон чегарасидан ташқарига чиқишни тақиқлаш таклиф этилмоқда.

Шунингдек, қарздорлар давлат хизматлари марказларида давлат хизматларидан фойдалана олмайди.