9 апрель куни буюк саркарда ва давлат арбоби Амир Темурнинг таваллудига 682 йил тўлди. Андижон вилоятида жойлашган Шарқий ҳарбий округига қарашли ҳарбий қисмда Амир Темур бюстининг тантанали очилиш маросими бўлиб ўтди. Бу ҳақда «Дарё»га Мудофаа вазирлиги матбуот хизмати хабар берди.
Андижон вилояти ҳокими Шуҳратбек Абдураҳмонов, ҳарбий округ қўшинлари қўмондони полковник Лутфулло Бузруков ҳамда кенг жамоатчилик вакиллари иштирок этган тадбирда Соҳибқирон Амир Темурнинг ҳарбий санъатга қўшган улкан ҳиссаси, унинг адолатпарвар ҳукмдор, юртсевар инсон бўлгани тилга олинди.
«Ҳарбий қисмда ушбу бюстнинг ўрнатилиши ҳарбий хизматчиларни буюк аждодларининг муносиб ворислари бўлишига, жанговар руҳнинг юксалишига, ҳарбийлар ҳузурига ташриф буюраётган ёш-авлодни ватанпарварлик руҳида тарбиялашга хизмат қилади», — дейилади Мудофаа вазирлиги ахборотида.
Санага бағишлаб ҳарбий қисм ҳудудида кўпкари мусобақаси ўтказилди, қурол-аслаҳа ва ҳарбий техника намойиши, бадиий китоблар кўргазмаси бўлиб ўтди. Шунингдек, ҳарбий хизматчилар томонидан Амир Темур давридаги кўпкари миллий ўйинининг саҳналаштирилган эпизодлари намойиш этилди.
Изоҳ (0)