9 апрель куни Бердақ номидаги қорақалпоқ давлат университетининг маданият саройида Ўзбекистоннинг энг таниқли тадбиркорлари томонидан ёш тадбиркорлар ва ёшлар учун «Глобал тадбиркорлик тармоғи» ҳафталиги доирасида «Муваффақиятга эришиш сирлари» маҳорат дарслари ташкил қилинди. Бу ҳақда «KRuz.uz» хабар бермоқда.
Маҳорат дарсларини Ёшлар иттифоқи Қорақалпоғистон Республикаси кенгаши раиси Абат Данияров очиб берди.
Тадбир аввалида меҳмонлар Қорақалпоғистон ҳақида ўзларининг илиқ фикрларини айтиб ўтди.
Қорақалпоғистонга биринчи марта келишим. Ташрифимиз шундай улуғ байрамга тўғри келганлигидан бахтиёрмиз. Барча Қорақалпоқ аҳлини Қорақалпоғистон Республикаси Конституциясининг 25 йиллик шодиёналари билан чин дилдан табриклаймиз!Ҳикмат Абдураҳмонов, Халқаро бизнес ва технологиялар уюшмаси раиси
Қорақалпоғистон ҳақида фикрларим жуда ижобий. Олдин ҳам бу юртга келиш бахтига мушарраф бўлганман ва ҳар гал келганимда бу халқнинг меҳмондўстлигидан ҳайратда қоламан. Очиғини айтаман, бу гал ҳам шундай бўлди. Ҳатто Тошкентда ҳам бундай очиқ юз, меҳмондўстликни учратмайсиз!Мурод Назаров,«Murad Buildings» асосчиси
Қорақалпоғистонга илк маротаба келишим. Нон-туз ҳурматини шу ердан сездик. Айниқса, жажжи қизалоқларнинг кулгуси, ўзларига ярашиб турган миллий кийимлари, ёниб турган кўзлари бизни ҳайратга солди.Ҳасан Мамасаидов, Dekos ва Office market асосчиси
Нукусга учинчи мартта келишим. Ҳар гал Қорақалпоғистонга келганимда мени ҳайратга соладиган нарса бу - шаҳардаги ўзгаришлар, қурилишлар, янги биноларнинг қад кўтаришидир. Мана бугун яна бир катта савдо комплекси бўлган «Korzinka»нинг қурилиш ишлари билан яқиндан танишдик.Қорақалпоғистоннинг туризм бўйича имкониятлари жуда катта. Ўтган йили Оролга боргандик. У ердаги Буюк Британиядан келган сайёҳлар билан гаплашганимизда шу нарса маълум бўлдики, улар сайёҳлик маршрутларини тўппа-тўғри Оролга мўлжал қилишиб, Тошкентда тўхтамасдан Мўйноқнинг ўзига келган эканлар. Биласизми, бу катта нарса! Бундан унумли фойдаланиш керак, холос.Акмал Пайзиев, My Taxi асосчиси
Изоҳ (0)