Инновацион ривожланиш вазири ўринбосари Шерзод Шерматов Президент Шавкат Мирзиёев томонидан, жумладан инвестициялардан маълум бир фоизни фанни ривожлантиришга ва илмий кадрлар тайёрлашга йўналтириш орқали, фанга бўлган эътиборни тубдан яхшилаш бўйича вазифа белгилангани юзасидан ўз фикрини билдириб ўтди.
«Бу жуда муҳим вазифа, чунки мажлисда таъкидланганидек, ушбу соҳада афсуски жуда кўп имкониятларни қўлдан бой бериб бўлганмиз», — деб ёзди у.
Жаҳон банкининг маълумотларига кўра Ўзбекистонда илмий изланишларга ажратилаётган маблағларнинг Ялпи ички маҳсулотдаги (ЯИМ) улуши атиги 0,2 фоиздан ҳам кам, бу эса дунёдаги ўртача кўрсаткичдан 11 баробар, Кореяникидан 22 баробар кам (ЯИМдан 4,28%), дейилади постда.
Вазир ўринбосарининг қайд этишича, Кореяда 2014 йилда ЯИМ 1411 миллиард доллар бўлганини инобатга олсак, фанга ажратилган маблағлар 60 миллиард доллардан кўп бўлиб чиқади (яъни деярли бутун Ўзбекистоннинг ЯИМдек). Бу эса Ўзбекистонда фанга ажратилган маблағлардан (124 миллион доллар, яъни 63 миллиард доллар ЯИМдан 0,2%) 485 маротаба (!) катта.
«Шунинг учун, инвестициялардан қандай фоизни ажратишни аниқлаётганда иқтисодчиларимиз бу масалада бошқа ривожланган, кўпинча яхши мисол сифатида кўрсатилаётган давлатлар тажрибасидан келиб чиқиб, улардаги фоизлар даражасида ажратишни кўзда тутсалар мақсадга мувофиқ бўларди. Масалан, Кореядагидек фанга ЯИМдан 4,28% ажратсак бу 2,7 миллиард доллар бўлар эди!» — деб ёзади Шерзод Шерматов.
Унинг қўшимча қилишича, 2018 йил давлат бюджети параметрларида фанга атиги 48 миллион доллар атрофида (389 миллиард сўм) маблағ кўзда тутилган.
Изоҳ (0)