7 апрель куни хорижий интернет-нашрлар Қирғизистон Давлат чегара хизматига асосланиб, Ўзбекистон ҳарбий хизматчилари Қирғизистон ҳудудида турган эркакка қарата ўқ узгани ҳақида хабар тарқатди.
«Интерфакс» агентлиги ахборотига кўра, Қирғизистоннинг Жалолобод вилояти Кербент шаҳри яқинида юз берган ҳодиса оқибатида 1984 йилда туғилган Қирғизистон фуқароси шифохонада вафот этган.
Агентликнинг қўшимча қилишича, Қирғизистон бош вазири Сапар Исоқов воқеани «Ўзбекистон томони билан биргаликда» ўрганиб чиқиш ҳақида кўрсатма берган.
Айни вақтда, Ўзбекистон ҳукуматидаги «Дарё» манбасининг маълум қилишича, Қирғизистон фуқаросига ўқ узилганида, у Ўзбекистон ҳудудида бўлган.
«У аввал огоҳлантирилган, сўнг осмонга қарата ўқ отилган, шундан кейин ҳам у бўйсунмагач, унга ўқ узилган. У Қирғизистон ҳудудигача етиб борган, у ерда уни шериклари кутиб олган ва машинада шифохонага олиб кетишган», — дейди манба.
Ўзбекистон тарафининг қайд этишича, ҳозирги пайтда ҳалок бўлган Қирғизистон фуқароси Ўзбекистон ҳудудига нима мақсадда киргани номаълум.
Изоҳ (0)