2—6 апрель кунлари Қозоғистоннинг Олмаота шаҳридаги ҳарбий-академик лицейда МДҲга аъзо давлатлар Мудофаа вазирликларининг курсантлари ўртасида математика йўналиши бўйича Халқаро олимпиаданинг навбатдаги баҳслари бўлиб ўтди. Унда Ўзбекистон Мудофаа вазирлиги курсантлари учинчи ўринни эгаллади. Бу ҳақда вазирлик матбуот хизмати «Дарё»га хабар берди.
Чирчиқ олий танк қўмондонлик-муҳандислик билим юртининг катта ўқитувчиси Раъно Юсупова бошчилигида курсантлар галдаги Халқаро олимпиаданинг иккинчи йўналиши (математика) бўйича Арманистон, Россия, Қозоғистон, Беларусь, Қирғизистон ва Тожикистон мамлакатларининг ҳарбий математиклари билан ўзаро билим синашиб, Ўзбекистон шарафини ҳимоя қилди.
Биринчи ўрин Россия Ҳарбий университети вакилларига насиб этди. Иккинчи ўринни қозоғистонлик ҳарбийлар эгаллади. Ғолиб ва совриндорлар кубок, медаллар ва эсдалик совғалари билан тақдирланди.
Ўзбекистон шарафини халқаро мусобақада муносиб ҳимоя қилган ҳарбий хизматчилар 8 апрель куни Тошкент вокзалида кутиб олинади.
Курсантлар ўртасидаги Халқаро олимпиаданинг навбатдаги баҳслари (информатика бўйича) 16—20 апрель кунлари Қозоғистонда бўлиб ўтади. Унда Ал-Хоразмий номидаги Тошкент ахборот технологиялари университетининг махсус факультети курсантлари иштирок этади.
Изоҳ (0)