Ўзбекистон Президенти 2 апрель куни Қозоғистон ва Туркманистон билан чегараларнинг туташган жойни белгилаш ҳамда Афғонистонга ҳуқуқий ёрдам кўрсатиш борасидаги иккита халқаро шартномани ратификация қилди. Ратификация борасидаги қонунлар «Халқ сўзи» газетасида эълон қилинди, деб хабар берди «Газета.uz».
Учта мамлакат чегараларининг туташган жойи тўғрисидаги битим 2017 йилнинг 10 ноябрида Ўзбекистон, Қозоғистон ва Туркманистон ташқи ишлар вазирлари томонидан Самарқандда бўлиб ўтган «Марказий Осиё: бир ўтмиш ва бир келажак, барқарор ривожланиш ва ўзаро фаровонлик учун ҳамкорлик» халқаро анжумани доирасида имзоланган.
Олий Мажлис Сенати матбуот хизматининг маълум қилишича, «шартнома чегарадош учта давлатларнинг ўзаро ҳурматини, суверен тенглиги ва ҳудудий яхлитлигини мустаҳкамлаш учун мустаҳкам пойдевор яратади».
Ўзбекистон ва Афғонистон ўртасида фуқаролик, оилавий ва жиноий ишлар бўйича ҳуқуқий ёрдам тўғрисидаги битим 2017 йил 5 декабрда Афғонистон президенти Ашраф Ғанининг Ўзбекистонга ташрифи чоғида имзоланганди.
Маълумотларга кўра, келишув «икки мамлакат ўртасидаги ҳамкорликнинг муҳим таркибий қисми бўлиб, уни янада тараққий эттиришга хизмат қилади». Ҳужжат, хусусан, икки мамлакат фуқароларини ҳуқуқий ҳимоя борасида тенг имкониятлар билан таъминлайди.
Изоҳ (0)