23—25 март кунлари Ўзбекистон Республикаси Фанлар академиясининг геномика ва биоинформатика марказида уч кунлик «Ёш биотехнолог» инновацион лагери уюштирилди. Бу ҳақда лагер ташкилотчилари «Дарё»га хабар бермоқда.
Инновацион лагерни ташкил этишдан мақсад ўқувчиларни геномика ва ген муҳандислиги соҳаларидаги замонавий инновацион технологиялар ва ушбу илм-фан йўналишларидаги Ўзбекистон олимларининг эришган ютуқлари билан яқиндан таништириш, ёш авлодни илм-фанга қизиқтириш ва инновацияларни ривожлантиришга жалб қилишдан иборатдир. Лагерда иштирок этиш учун Тошкент вилояти Қибрай тумани мактабларидан ҳар йили биология ва кимё фанлари бўйича ўтказиладиган олимпиадаларда фаол иштирок этадиган иқтидорли ўқувчилар танлаб олинди.
Уч кун мобайнида ўқувчилар тўғридан-тўғри лаборатория тажрибаларида иштирок этди ва марказ олимларининг қизиқарли маърузаларини эшитди.
Лагернинг учинчи кунида ўқувчилар Ўзбекистон Республикаси Инновацион ривожланиш вазири, академик Иброҳим Абдураҳмонов билан учрашди. Вазир марказ номидан лагер иштирокчиларга эсдалик совғалар топширди.
Изоҳ (0)