Бандлик ва меҳнат муносабатлари вазирлигида Ўзбекистонга ташриф буюрган Халқаро миграция ташкилоти (ХМТ) бош директори Уильям Свинг бошчилигидаги делегация билан учрашув бўлиб ўтди. Бу ҳақда ЎзА хабар бермоқда.
Унда ХМТнинг Марказий Осиё бўйича ҳудудий мувофиқлаштирувчиси Деян Кесерович, Марказий Осиё бўйича мувофиқлаштирувчи офисининг Ўзбекистон билан алоқалар бўйича дастурий ходими С.Тошбоев, Ўзбекистон Республикаси Бош прокуратураси, Ички ишлар вазирлиги вакиллари иштирок этди.
Учрашувда мигрантларга ёрдам кўрсатиш, миграция оқимини тартибга солишнинг ҳуқуқий механизмларини ишлаб чиқиш масалалари бўйича Ўзбекистон билан ХМТ ўртасидаги муносабатлар муҳокама қилинди. Ўзбекистонда 2016 йилдан буён одам савдоси ва экстремизмга қарши курашиш соҳаларида қўшма лойиҳалар амалга оширилаётгани қайд этилди.
Тадбирда Ўзбекистонга ХМТга қўшилиш масаласи бўйича фикр алмашилди. Таъкидланганидек, Ўзбекистон Республикаси мазкур халқаро ташкилот аъзоси бўлмаган ҳолда, ХМТ томонидан ўтказилаётган лойиҳаларда фаол иштирок этмоқда. ХМТга аъзо бўлиш мамлакатга ташкилотга аъзо давлатлар билан ҳамкорлик қилиш учун кенг салоҳиятга эга бўлиш имконини беради.
ХМТ бош директори бугунги кунда мазкур нуфузли ташкилотга аъзо бўлиш бўйича ҳуқуқий асос тайёрланаётгани тўғрисида хабардор қилинди. Ўз навбатида, Уильям Свинг Ўзбекистонни ташкилотга қабул қилиш бўйича ҳар томонлама ёрдам кўрсатишга тайёр эканини билдирди.
ХМТ делегацияси, шунингдек, қатор вазирлик ва идораларда ҳам музокаралар ўтказди.
Изоҳ (0)