Икки метрли тимсоҳни ютиб юбормоқчи бўлган анаконда беозор деб топилди

Тринидад ва Тобаго Қишлоқ хўжалиги вазирлиги ўз ходимларининг кўз ўнгида икки метрли кайманни (Марказий ва Жанубий Америкада яшовчи тимсоҳларнинг бир тури) ютиб юборишга уринган 3,7 метрли анаконда ҳозирда одамлар учун хавф туғдирмаётганини маълум қилди, деб хабар беради The Trinidad Guardian.

Улкан илонни Тринидад оролининг шимолида жойлашган ферма ходими у ўз ўлжасини ютаётган вақтида пайқаб қолган. «Илонни маҳаллий ҳудуддаги кўлнинг олдига борган ишчилардан бири кўриб қолган», — дейди ветеринар Нешал Рамперсад. Унинг сўзларига кўра, содир бўлган воқеа худди National Geographic’нинг фильмларига ўхшаб кетган.

Кўлнинг атрофига йиғилган одамлар судралиб юрувчини ўз мобил телефонларига тасвирга ола бошланган. Томошабинлардан бири анакондага тегингач, у кайманни ташлаб сув остида қочиб кетган. Бироздан кейин ферма ходимлари уни сувдан чиқариб олган.

Воқеа жойига West-India университетидан герпетолог олиб келинган. Мутахассис билан маслаҳатлашилганидан сўнг, ҳукумат вакиллари анакондани тинч қўйишга қарор қилди. Агар келажакда илон ферма ходимлари ёки ҳайвонлар хавфсизлигига таҳдид уйғотса, бошқа жойга кўчириб ўтказилади.

Бундан олти йил олдин Тринидадда узунлиги 5,2 метр, оғирлиги 100 килограмм бўлган анаконда қўлга олинганди. Маълумотларга кўра, бу сўнгги 30 йил ичида Жанубий яримшарда аниқланган энг катта илон ҳисобланади.