АҚШда мактаб битирувчиси 20 та университетга ҳужжат топшириб, уларнинг барчасига қабул қилинди

АҚШнинг Техас штати Хьюстон шаҳрида яшовчи 17 ёшли Микель Браун исмли ўсмир АҚШнинг 20 та энг яхши университетига кириш ҳужжатларини топшириб, уларнинг барчасига қабул қилинди, унга жами 260 минг доллар стипендия таклиф қилишди, деб ёзади Forum Daily.

Йигитча ўзи учун эшиклари очиқ бўлган 20 та университет ичида 8 та энг нуфузлисидан биттасини танлайди, булар: Гарвард, Принстон, Шимоли-Ғарбий университет, Йель, Пенсильвания университети, Стэнфорд, Жоржтаун университети ва Вандербильт университети.

Микель мактабда ўқиб юрган пайтларида дебатларда, (мактабда ўрганиш учун уюштирилган) ясама суд ишларида ва ўқув маъмуриятида фаол иштирок этган. Шунингдек, у сиёсий кампанияларда, хусусан, Барак Обаманинг президентлик кампаниясида кўнгилли сифатида қатнашган.

Ҳозирда у сиёсатшунослик ва иқтисодиёт соҳасида таълим олиш ниятида.

Микель апрель ойида уни қабул қилган университетларнинг ҳаммасига бориб кўрмоқчи, якуний танловни эса 1 май куни амалга оширмоқчи.