Миллатлараро муносабатлар ва хорижий мамлакатлар билан дўстлик алоқалари қўмитасида Ўзбекистонга ташриф буюрган Мўғулистон дўстлик жамиятлари кенгаши раиси, Мўғулистон Қаҳрамони, космонавт Жугдердемидийн Гуррагча бошчилигидаги делегация билан учрашув бўлиб ўтди. Бу ҳақда «Дарё»га қўмита матбуот хизмати хабар берди.
Қўмитаси раиси Рустам Қурбонов делегация аъзоларига Президент ташаббуси билан ташкил этилган мазкур қўмита фаолияти тўғрисида маълумот берди. Ҳозирги кунда қўмита «халқ дипломатияси» механизмидан фаол фойдаланган ҳолда тинч ва фаровон ҳаётни асраш, хорижий мамлакатлар билан дўстона муносабатлар ва маданий-маърифий алоқаларни ривожлантириш, чет элдаги ватандошларимиз билан яқин муносабатларни йўлга қўйишга салмоқли ҳисса қўшмоқда.
Учрашувда мамлакатннинг туристик салоҳияти хусусида ҳам маълумот берилди. Ўзбекистонда ҳар йили бир нечта халқаро туристик ярмарка ва фестиваллар ташкил этилади. Унда Мўғулистон туристик компанияларининг иштироки икки давлат халқлари учун фойдали бўлиши таъкидланди.
Ж.Гуррагча самимий қабул учун миннатдорчилик билдириб, Ўзбекистон билан аввалдан дўстона алоқалар ўрнатилгани ва анъанавий маданият кунлари ташкил қилиниб келинганини эслади. Коинотга бирга учган ўзбекистонлик фазогир Владимир Жонибеков билан ҳозиргача дўстона алоқада эканини таъкидлади. Мазкур учрашувдан асосий мақсад ҳам шу алоқаларни тиклашдир.
Учрашув доирасида Миллатлараро муносабатлар ва хорижий мамлакатлар билан дўстлик алоқалари қўмитаси ҳамда Мўғулистон дўстлик жамиятлари кенгаши ўртасида ҳамкорлик меморандуми имзоланди.
Изоҳ (0)