Тошкент шаҳар божхона бошқармаси томонидан Highway Logistics Center МЧЖ транспорт-логистика марказининг божхона терминалида тадбиркорлик субъектлари, хусусан экспорт ҳамда ишлаб чиқариш фаолияти билан шуғулланувчи ташқи иқтисодий фаолият қатнашчилари учун учрашув ташкил этилди. Бу ҳақда Давлат божхона қўмитаси матбуот хизмати маълум қилди.
Тошкент шаҳрида йил бошидан 20 мартга қадар товарлар экспорти 38,8 миллион долларни ташкил этган. Бу кўрсаткич йилнинг биринчи чорагида 40 миллион доллардан ошиши кутилмоқда.
Тадбир давомида пойтахтда рўйхатдан ўтган экспортчи корхоналарнинг божхона расмийлаштируви билан мавжуд муаммолари ишчи тартибда ўрганилиб, амалий ечими таъминланди.
Ўрганиш жараёнида «Экспортёр корхоналарни қўллаб-қувватлаш мақсадида, уларда мавжуд муаммо ва таклифларга аниқлик киритиш ва амалий ёрдам кўрсатиш бўйича маълумотлар варағи» шакллантирилди.
Унда корхонанинг умумий маълумоти, ишлаб чиқариладиган маҳсулот, шундан экспортга ва ички бозорга чиқарилган маҳсулотлар ҳажми, ишлаб чиқариш учун импорт қилинадиган хом ашё, мавжуд муаммоси, билдирилган таклифлари ва улар амалга оширилганида эришиладиган экспорт кўрсаткичлари истиқболлари тўғрисидаги маълумотлар ўрин олди.
Бевосита мулоқот тарзида ўтган тадбир жорий йилдан фаолиятини бошлаган замонавий логистика божхона комплексида «Арк-булоқ» ТИФ божхона постида бежизга ўтказилмаганлигига тўхталиб ўтилди. Хусусан, мазкур постда автотранспорт воситаларида экспортга юборилаётган барча турдаги маҳсулотларни тез фурсатда расмийлаштириш тизими яратилган.
Шунингдек, мазкур божхона пости орқали экспорт қилиш учун олиб ўтилаётган товарлар замонавий рентген аппарати орқали тез ва қулай божхона кўригидан ўтказилиб, қисқа фурсатда божхона расмийлаштируви ишлари амалга оширилади ҳамда экспортга йўналтирилади. Бир сутка мобайнида божхона пости орқали ўртача 50 та автотранспорт воситасини божхона назоратидан ўтказиб, экспортга йўналтириш имконияти йўлга қўйилган.
Йиғилишда экспортчи ташкилотларнинг хом-ашё товарларига божхона тўловларидан имтиёзлар жорий қилиш, сертификатлаш муддатларини қисқартириш, божхона расмийлаштирувини янада соддалаштириш, коммунал тўловлар, банк кредит фоизларини пасайтириш каби таклифлари билдирилди.
Тадбирда билдирилган фикр, таклиф ҳамда мулоҳазалар инобатга олиниб, улар томонидан экспорт ҳажмини камида икки баробарга ошириш ҳамда келгусида корхоналарни экспорт билан шуғулланишини рағбатлантиришга қаратилган таклифлари юқори мутасадди вазирликлар ва Тошкент шаҳар ҳокимлигига киритилиши белгиланди.
Изоҳ (0)