Фарғона вилоятининг Учкўприк туманидаги Меҳнатобод қишлоғи аҳолисини қарийб 10 йилдан буён тоза ичимлик суви муаммоси қийнаб келади. Бу ҳақда «Дарё»га журналист Азиз Ирматов маълум қилди.
Ҳудуддаги мактаб, қишлоқ оилавий поликлиникаси ва бошқа ижтимоий объектларга ичимлик суви тармоғи тортилмаган, мавжуд тармоқлар эса фойдаланишга яроқсиз ҳолатда эди. Бу муаммо халқ билан мулоқот қилиш, маҳаллаларда ва оилаларда ижтимоий-маънавий муҳитни ўрганиш ҳамда аниқланган муаммоларни бартараф этишга кўмаклашиш мақсадида айни пайтда мазкур туманда фаолият олиб бораётган Қонунчилик палатаси депутатлари ва Сенат аъзоларидан иборат ишчи гуруҳининг ўринли эътирозига сабаб бўлди. Йиллар давомида ечимини кутиб, аҳолини қийнаб келаётган муаммо туман ҳокимлиги томонидан шу куннинг ўзида ҳал этилди.
— Мактаб ва қишлоқ оилавий поликлиникаси тоза ичимлик суви билан таъминланди, — дейди туман «Сувоқова» давлат унитар корхонаси раҳбари Ойбек Шукуров. — Шунингдек, 2 километр масофага полиэтилен қувурлар ётқизиш ва ичимлик суви тармоғи тортиш ишлари бошлаб юборилди. Таъмирлаш-монтаж ишлари якунлангач, 307 хонадонда истиқомат қиладиган 1,5 мингдан ортиқ фуқаронинг ичимлик суви таъминоти яхшиланади.
Шунингдек, ишчи гуруҳ ташаббуси билан қишлоқ аҳолиси туман тиббиёт бирлашмасининг малакали шифокорлари томонидан чуқурлаштирилган тиббий кўрикдан ўтказилди. Саломатлигида муаммоси бор фуқароларга амбулатор ва стационар даволаниш учун бепул йўлланмалар берилди.
Депутат ва сенаторлар Учкўприк тумани ҳудудларини ўрганиб, жойларда фуқаролар билан учрашувларни давом эттирмоқда.
Изоҳ (0)