Шавкат Мирзиёев «Ўзбекистон Республикасида мева-сабзавотчиликни жадал ривожлантиришга доир қўшимча чора-тадбирлар тўғрисида»ги фармонни имзолади.
Фармон билан мамлакатда «уруғ—кўчат—маҳсулот етиштириш—тайёрлаш—сақлаш—қайта ишлаш—транспортировка қилиш—бозорга етказиш» тамойили бўйича узлуксиз занжирни шакллантиришни кўзда тутувчи мева-сабзавот маҳсулотлари ишлаб чиқаришни ташкил этишнинг кластер усули жорий этилади.
Қорақалпоғистон Вазирлар Кенгаши раиси, вилоятлар ва туманлар ҳокимларига чигитдан бўшаган ерларда қишлоқ хўжалиги экинларини экишда мева-сабзавот маҳсулотларини етиштириш, қайта ишлаш ва сотиш, жумладан экспорт қилишни ташкил қилиш, замонавий ресурс ва сувни тежовчи технологияларни жорий этиш, янги иш ўринлари яратиш вазифаларини ўз зиммасига оладиган хўжалик юритувчи субъектларига биринчи навбатда ердан узоқ муддатли ижара шартларида фойдаланиш ҳуқуқини тақдим этиш вазифаси юкланди.
2018 йилда ҳар бир ҳудудда 1-2 та мева-сабзавот кластерлари ташкил этилади. 2019 йилдан бошлаб мева-сабзавот етиштиришга ихтисослашган барча туманлар қишлоқ хўжалик ишлаб чиқаришни ташкил этишнинг кластер шаклига жалб этилади.
«Ўзбекэнерго» ва «Ўзтрансгаз» акциядорлик жамиятлари, шунингдек, Қорақалпоғистон Республикаси Вазирлар Кенгаши ва вилоятлар ҳокимликлари зиммасига мева-сабзавот кластерларини электр энергия ва табиий газ билан узлуксиз таъминлаш учун шахсий жавобгарлик юклатилди.
2018 йилнинг 1 апрелидан битта мева-сабзавот кластери ичида сотиладиган маҳсулотга қўшимча қиймат солиғи солинмайди ва давлатнинг мақсадли фондларига мажбурий ажратмалар ундирилмайди.
2021 йил 1 январга қадар:
Кўчатхоналар ва иссиқхоналарда уруғ, кўчат ва пайвандтаг етиштирувчи ва уларни қишлоқ хўжалиги маҳсулотлари ишлаб чиқарувчиларига етказиб берувчи хўжалик юритувчи субъектлари барча турдаги солиқ ва йиғимлар тўлашдан;
Четдан олиб кирилаётган уруғлар, кўчатлар ва пайвандтаглар, минерал ўғитлар, ўсимликларни кимёвий ҳимоялаш воситалари, замонавий энергия тежовчи иссиқхоналар ва уларнинг бутловчи қисмлари божхона тўловларидан (божхона расмийлаштируви учун йиғим бундан мустасно);
Импорт бўйича олиб кирилаётган, мева-сабзавот маҳсулотларини ташишга ихтисослашган транспорт воситалари божхона тўловлари ва Республика йўл жамғармасига йиғимлар тўлашдан озод этилди.
Қишлоқ хўжалиги маҳсулотлари ишлаб чиқарувчиларининг буюртмаларига кўра жалб қилинадиган хорижий мутахассислар учун рухсатномалар бериш, кўп марталик визаларни расмийлаштириш, бериш ва узайтириш, шунингдек, яшаш жойи бўйича вақтинча прописка қилиш, ҳисобга қўйиш ва вақтинча пропискани узайтириш таъминланади.
Изоҳ (0)