Шавкат Мирзиёев 30 март куни Жиззах вилоятига ташриф буюрди. Ўзбекистон Президенти дастлаб Зарбдор туманидаги «Зарбдор текстиль» масъулияти чекланган жамияти фаолияти билан танишди, деб хабар берди Президент матбуот хизмати.
Бу корхонани бунёд этиш бўйича Ўзбекистон Президенти ўтган йили вилоятга ташрифи чоғида топшириқ берган эди. Шавкат Мирзиёев яқинда Самарқанд вилоятида бўлганида ҳар бир туманда камида иккитадан текстиль корхоналари қуриш зарурлигини таъкидлаган эди.
Янгидан қурилиб, фойдаланишга топширилаётган «Зарбдор текстиль» ана шундай замонавий корхоналардан. Бу ерда жами 1 минг 60 дан ортиқ киши доимий иш билан таъминланади. Маҳсулотлар ички бозорни тўлдириб, экспортга ҳам йўналтирилади.
«Менинг энг катта мақсадим одамларни иш билан, даромад билан таъминлаш. Энди бир килограмм пахтамизниям четга сотмаймиз, юртимизда қайта ишлаймиз, қўшимча қийматли маҳсулотлар ишлаб чиқарамиз», — деди Шавкат Мирзиёев.
Шу ерда Жиззах вилоятида тўқимачилик, кимё, фармацевтика соҳаларини ривожлантириш, инвестицияларни жалб этишга доир лойиҳалар тақдимоти ўтказилди.
Изоҳ (0)