«Korzinka.uz» супермаркетлар тармоғи раҳбари Зафар Ҳошимов ўзининг Facebook’даги саҳифасида Импорт ўрнини босувчи ва экспортбоп маҳсулотлар ишлаб чиқаришни маҳаллийлаштиришни янада чуқурлаштириш борасидаги қарор лойиҳаси бўйича ўз фикрини ёзиб қолдирди.
2013 йилларда укам Алишер Ҳошимов билан «Korzinka» тармоғи маҳсулотларини келажакда ривожлантириш борасида тез-тез баҳслаша бошлагандик. Мен ўз тортларимиз ва салатларимизни ишлаб чиқаришни йўлга қўйишимиз кераклигини таъкидлардим. Бу орқали биз ушбу йўналишдаги маржиналликни оширишимизга ишонардим. Шунингдек, бунинг учун катта сармоя ҳам шарт эмасди.
Алишер ўшанда шундай деганди:
«Зафар ака, балки биз бу ишни бошлармиз ва ишлаб чиқаришни йўлга ҳам қўярмиз, бироқ бу бизнинг кучли томонимиз бўлмайди. Чунки аввал бу иш билан шуғулланмаганмиз, шу сабабли қаттиқ ҳаракат қилишимиз, кўплаб хатоларга йўл қўйишимиз ва мутахассисларни ёллашимизга тўғри келади. Ушбу соҳадаги яхши мутахассислар ўзининг бизнесини бошлаб юборган. Бизнинг ҳозирда етказиб берувчиларимиз, қандолатчилар ва салатчиларимиз мазкур соҳада кўп йиллик тажрибага эга ва бу уларнинг шахсий бизнеси. Биз ёллайдиган мутахассислар профессионал даражада яхши бўлиши даргумон, шунингдек, биз ёллаган қандолатчи ва ошпазлар ҳеч қачон ўз бизнесини юритаётганлардек шижоат билан ишламайди. Деярли ҳар ҳафтада янгидан-янги ишлаб чиқарувчилардан таклифлар келиб тушмоқда. Етказиб берувчилар ўртасидаги бу каби рақобат бизга улар орасидан энг яхшисини танлаб олиш, уларнинг нархи ва сифатини назоратда ушлаш имкониятини беради. Ишлаб чиқарувчилар мижоз сифатида бизни йўқотиб қўймасликка ҳаракат қилади, шу сабабли асосан бизнинг талабларимизга кўнади, чунки рақобат жуда кучли. Бу уларни бизнинг маҳсулотларимиз таннархини паст қилиш билан бирга, ўзларининг ишлаб чиқариш ҳажми борасида доимо курашишга ва фойда кўришга ундайди.
Агарда биз ишлаб чиқаришни йўлга қўядиган бўлсак, юқорида санаб ўтган омилларимни инобатга олган ҳолда ишончим комилки, маҳсулотимиз нархи қимматлашса қимматлашадики, арзон бўлмайди.
Алишер бироз нафас олиб, яна давом этди:
«Бундан ташқари, биз ишлаб чиқарган маҳсулот ушбу соҳадаги профессионал ва мутахассисларникидан сифатли бўлишини ҳеч ким кафолатламайди. Нархи ва сифати борасида бозордагилардан ортиқ бўлмаган маҳсулот ўзимизники бўлгани сабаб харидорларга уни таклиф этишга мажбур бўламиз. Шу билан бирга ўз маҳсулоти сифатли ва арзон бўлган етказиб берувчилар билан ҳам курашишимизга тўғри келади. Энг муҳими буларнинг барчасига асосий ресурсимизни — вақтимизни сарфлаймиз. Биз маркетлар очиш ва уларни бошқаришни яхши эплаяпмиз. Нега энди биздан кўра яхши ва арзон ишлаб чиқарилган тортлар, салатлар ва бошқа нарсаларни тақдим этмаслигимиз керак. Нега энди бошқалардан кўра яхшироқ бажарадиган ишимизни давом эттирмаслигимиз керак», — деган эди Алишер.
Ўшанда укам бу борада ўз фикрига мени ишонтира олганидан хурсандман. Ишончим комилки, унинг гапларига қулоқ солмаганимизда хато қилган бўлардик: бошқалардан кучли бўлмаган ва деярли ҳеч нимага тушунмаган ишимиз билан шуғулланиб куч ва ресурсларимизни сарфлаган, энг муҳими бошқаларга қараганда яхшироқ уддалайдиган соҳамизга вақтимизни сарфлай олмаган бўлардик.
Нега бу воқеани эслаб қолдим?
Импорт ўрнини босувчи ва экспортбоп маҳсулотлар ишлаб чиқаришни маҳаллийлаштиришни янада чуқурлаштириш борасидаги қарор лойиҳасини ўқиганимдан кейин ёдимга тушди. Бу худди бизнинг тармоқ ўз харидорларига сотаётган барча маҳсулотларни ишлаб чиқариш учун уринишига ўхшайди. Агарда ҳаммасини бажарашнинг имкони бўлганида ҳам, шубҳасиз, уларнинг нархи ва сифати энг яхши бўлмайди. Шундай экан: нега? Нега шунча вақтни, ресурсларни, имтиёзлар, валюталарни сарфлаб «велосипед ихтиро қилиш керак?». Нега ҳамма нарсани ишлаб чиқариш керак? Аввал бошидан қўлимиздан келадиган иш билан шуғулланганимиз яхшимасми?
Бу каби соҳаларни қандай топамиз? Жуда осон: барча соҳалар учун бирдек имтиёзларни, кам солиқ юкламаларини яратиш ва тарифлар ва қозоғбозликларни қисқаритириш керак. Янги бизнесларни диққат билан кузатиб бориш ва эҳтиёткорлик билан мониторинг қилиш, тармоқлар ривожланишини ўрганиш орқали ресурслар, ер участкалари ва бошқа нарсаларни тақдим этиш жараёнларини тезлаштириш ҳамда уларнинг шаффофлигини таъминлаш керак. Ишончим комилки, алоҳида соҳа ва лойиҳаларга берилаётган имтиёзлар ҳаммага бирдек тақдим этилса иқтисодий ўсишга эришамиз, бунда ҳатто бюджетга ҳам зарар етмайди. Фақатгина номутаносиблик ва мувозанатсизлик, ошна-оғайничилик ва сунъий тўсиқларсиз яқин вақт ичида ўз иқтисодиётимизнинг чемпионларини аниқлай оламиз.
Изоҳ (0)