Ўзбекистон Президенти матбуот котиби Комил Алламжонов Самарқанддаги кўча тозалаш ишларига жалб этилган 23 ёшли ўқитувчи Диана Иникованинг вафоти юзасидан ўрганиш олиб борилаётганини маълум қилди. Алламжонов бу ҳақда Facebook’даги саҳифасидаги муҳокама давомида айтиб ўтган.
17 март куни Президент Шавкат Мирзиёевнинг Самарқанд вилоятига ташрифи бошланди. Шу муносабат билан, Давлат раҳбарининг матбуот котиби Facebook’даги саҳифасида ташрифдан кўзланган мақсад ҳамда ташриф кун тартиби ҳақида қисқа ахборот пости қолдирган.
Мазкур пост остида бошланган муҳокамада эса Facebook фойдаланувчиларидан бири шундай савол билан Президент матбуот котибига мурожаат қилган:
Ҳокимлар Президент келишидан сал олдин асосан ўқитувчиларни катта ва кичик йўл ёқаларига чиқариб, тозалаш ишларига «мажбурлайди». Шу тўғрими? Ёки бу кичкина масала ҳисобланадими? Бир неча кун олдин Самарқанд катта кўчасини тозалаётган вақтда 23 ёшли ўқитувчи машина уриб кетиши натижасида вафот этган. Умуман шу каби «ҳокимларга хос» анъана қачон тугатилади?Президент матбуот котиби Комил Алламжонов бу саволга қуйидагича жавоб қайтарган:
Бўлиб ўтган ҳодиса, албатта, жуда ачинарли. Фожиага олиб келган сабаблар ҳозирда ўрганилмоқда. Натижасига кўра тегишли чоралар белгиланади. Ўз номимдан марҳуманинг оиласи ва яқинларига чуқур таъзия изҳор этаман.Эслатиб ўтамиз, 14 март куни Самарқанд вилояти Каттақўрғон туманида кўча тозалаш ишларига жалб қилинган 23 ёшли Диана Иниковани катта йўлдаги тўсиқларни оқлаш чоғида юк машинаси уриб кетган.Иникова зудлик билан шифохонага олиб борилганига қарамай, у вафот этган. 15 март куни Диана Иникова дафн қилинган. Маълумотларга кўра, у эндигина олийгоҳни тамомлаб, мактабда меҳнат таълими фанидан дарс бера бошлаган эди.Комил Алламжонов, Ўзбекистон Президенти матбуот котиби
Қайд этишларича, мазкур мудҳиш ҳодиса ҳам ўқитувчиларнинг кўча тозалаш ишларига жалб этилишини тўхтата олмаган — 16 март куни тарқатилган хабарларда Самарқанд вилоятида ўқитувчилар ҳали ҳам кўчаларда ишлашда давом этаётгани таъкидланган эди.
Изоҳ (0)