Apple ўзининг машҳур iPhone смартдонларини Хитойдаги корхоналардан бирида ишлаб чиқаришни тўхтатди. Бунга компания ҳамкорларидан бирининг сертификатга эга бўлмаган қисмлардан фойдаланганлиги сабаб бўлди, деб хабар беради «MobInfo.uz».
Ҳисобига Хитойда ишлаб чиқариладиган iPhone 8 Plus смартфонларининг 20 фоизи тўғри келувчи Wistron компанияси қурилмаларни йиғишда Apple сертификатига эга бўлмаган сув ўтказмайдиган эҳтиёт қисмлардан фойдаланган.
Wistron бу каби смартфонлардан қанчасини йиғгани ва улардан нечтаси харидорлар қўлига етиб боргани номаълум. Бироқ ушбу ҳодиса компания имиджига таъсир кўрсатди — унинг акциялари беш фоизга тушиб кетган.
Заводда қурилмаларни йиғиш икки ҳафтага тўхтатилди. Аммо хитойликлар «олма»сиз қолмайди: смартфонларнинг аксарияти Foxconn компаниясининг корхоналарида ишлаб чиқарилади. Унинг ҳисобига Хитойда ишлаб чиқариладиган Apple қурилмаларининг 80 фоизи тўғри келади.
Эслатиб ўтамиз, Тайваннинг Foxconn компанияси МДҲ ва бошқа мамлакатларга iPhone смартфонларини етказиб беради. Завод Гонконг яқинидаги Шэньчжэнь шаҳрида жойлашган. Foxconn компаниясининг заводлари нафақат Хитойда, балки Чехия, Венгрия, Ҳиндистонда ҳам мавжуд.
Изоҳ (0)