Эронлик iPhone фойдаланувчилари 15 март куни App Store мобил дастурлар дўкони ўзлари учун ёпиқ эканлигини пайқаб қолди. Дўкондан бирор нимани кўчиришга ҳаракат қилинганида экранда хатолик белгиси пайдо бўлмоқда. Бу ҳақда эронлик фойдаланувчиларга асосланиб, TJournal хабар берди.
Bleeping Computer нашрининг маълумотларига кўра, гап мамлакат фойдаланувчиларини IP-манзиллар орқали блоклаш ҳақида кетмоқда. Аввалроқ улар созламалар орқали App Store минтақасини ўзгартириб, дастурни кўчириб олишлари мумкин эди, бироқ Apple бунга чек қўйган. Дастурни кўчириб олишга ҳаракат қилинганида «Жойлашган мамлакатингиз ёки минтақангизда App Store’дан фойдалана олмайсиз» ёзуви чиқиб қолмоқда.
Шунга қарамай Эрондаги Apple қурилмаларининг ишқибозлари VPN-сервислар ёрдамида блокни четлаб ўтмоқда. Аммо бу каби ҳолатда смартфондан тўлақонли фойдаланишнинг иложи йўқ, чунки VPN орқали интернет одатдагидан анча секин ишлайди.
Блокланишга нима сабаб бўлгани ҳозирча номаълум, аммо The Verge нашрининг ёзишича, бу АҚШ Эронга нисбатан санкцияларини кучайтиргани натижасида юзага келган бўлиши мумкин. Apple бу борада саволларга жавоб бермади.
Санкциялар сабабли Америка компанияси Эрон ҳудудида смартфонларини сотмайди ва у ерда офислари ҳам мавжуд эмас. Шундай бўлса-да мамлакатга ноқонуний равишда миллионлаб iOS қуриламалари олиб кирилади.
Изоҳ (0)