Тошкент шаҳар Ички ишлар бош бошқармаси Йўл ҳаракати хавфсизлиги бошқармасининг яқинда ишга туширилган сайти (ubdd.uz) бош бошқарма фаолияти очиқлигини таъминлаш бўйича бошқа чора-тадбирлар каби аҳолининг ички ишлар органларига ишончини оширишда ёрдам бериши керак. Бу ҳақда Ички ишлар вазири ўринбосари, Ички ишлар бош бошқармаси бошлиғи Рустам Жўраев журналистлар билан уюштирилган мулоқот чоғида айтиб ўтди, деб ёзади «Газета.uz».
Унинг фикрича, ҳуқуқ-тартибот посбонлари нафақат ўз ишини яхши бажариши, балки уни тўғри кўрсата олиши ҳам керак.
«Биз Йўл ҳаракати хавфсизлиги бошқармаси сайтини фақат одатдаги ишимизни кўрсатиш учун ишга туширмадик — бу шундай ҳам бизнинг ишимиз ва кимгадир қизиқарли бўлиши амри маҳол. Одамлар биз қандай яхши ва савобли ишлар қилганимизга қизиқади», — деди ИИББ бошлиғи.
Сайт ишга туширилгач, ўн кун ичида 149 та мурожаат ва таклифлар келиб тушган. «Мобил мухбир» бўлими орқали қайд этилган қоидабузарликлар ҳақида келаётган фотосуратлар ва видеороликлар бўйича чоралар кўрилмоқда. Шунингдек, Facebook’даги «Водители Ташкента» гуруҳидаги постларга ҳам эътибор қаратилмоқда.
ИИББ бошлиғи интернет фойдаланувчиларининг йўл ҳаракати қоидалари бузилиши ҳақида хабар берганлар «чақимчи» ҳисобланиши ҳақидаги гапларига ҳам изоҳ билдирди.
«Биз ЙПХ инспекторини ҳар 100 метрга қўя олмаймиз, аммо одамлар фаоллик кўрсатса, бу бизга катта ёрдам беради. Бундай одамларни чақимчи дейиш нотўғри. Бундай гапларни ўзлари қоида бузишни ва юқори тезликда юришни яхши кўрадиганлар ёзишига ишончим комил. Биз барчамиз бунинг устида ишлашимиз керак», — деди у.
Изоҳ (0)