Парламент қуйи палатаси Фуқароларнинг соғлиғини сақлаш масалалари қўмитаси томонидан «Тиббиёт ходимлари малакасини ошириш ва уларни қайта тайёрлаш ҳолати: муаммо ва ечимлар» мавзусида давра суҳбати ташкил этилди. Бу ҳақда ЎзА хабар берди.
Жорий йил 16—26 февраль кунлари депутатлар ҳудудларда бўлиб, жойларда фуқароларнинг соғлиғини сақлаш борасида амалга оширилаётган ишларнинг ҳолати билан танишди. Мавжуд муаммоларни ҳал этиш чораларини кўришга алоҳида эътибор қаратилди. Жумладан, 144 тиббиёт муассасасининг фаолияти жойида ўрганилди ҳамда беморлар ва тиббиёт ходимлари билан бевосита суҳбатлар ўтказилди. Соғлиқни сақлаш соҳаси бўйича кўтарилган 368 масаладан 189 таси жойида ҳал этилди.
Ўрганишлар жараёнида тиббиёт ходимларини қийнаб келаётган бир неча муаммолар борлиги аниқланди. Масалан, тиббиёт ходимлари малака оширишга ва қайта тайёрлашдан ўтишга борган вақтда йўлкира ва яшаш харажатлари бўйича муаммоларга дуч келмоқда.
Ўзбекистон Республикаси Меҳнат кодексининг 166-моддасида иш берувчи ва меҳнат жамоаси манфаатларига доир вазифаларни бажариш (малака ошириш, рационализаторлик таклифларини жорий этишда қатнашиш, хизмат сафарида бўлиш, тиббий кўрикдан ўтиш ва бошқа ҳолларда) мақсадида ходимни ишдан озод этиш шартлари, шунингдек, ана шу давр учун тўланадиган кафолатли тўловлар миқдори жамоа шартномаларида белгилаб қўйилган. Бу тўлов миқдори ўртача иш ҳақидан кам бўлмаслиги кераклиги белгиланган.
Шунингдек, Вазирлар Маҳкамасининг 2017 йил 4 апрелдаги «Тиббиёт ходимларининг малакасини ошириш ва уларни қайта тайёрлаш тизимини такомиллаштиришга доир қўшимча чора-тадбирлар тўғрисида»ги қарорида асосий ишидан ажралган ҳолда тиббиёт ходимлари малакасини ошириш курсларига юборилган тингловчиларнинг бутун ўқиш даврида асосий иш жойи бўйича ўртача ойлик иш ҳақи сақланиб қолиши ҳамда асосий ишидан ажралган ҳолда тиббиёт ходимлари малакасини ошириш курсларига юборилган бошқа шаҳарлик тингловчилар учун ўқиш жойига бир марта келиш ва кетиш, яшаш харажатлари қонун ҳужжатларида белгиланган тартибда юборувчи томон ҳисобига қопланиши белгиланган.
Депутатлар томонидан ўтказилган ўрганишлар ва таҳлилларга кўра, баъзи ҳудудларда асосий ишидан ажралган ҳолда малака ошираётган тиббиёт ходимларининг ўртача ойлик иш ҳақи сақланиши, шунингдек, бошқа шаҳарга борганда йўлкира ва яшаш харажатлари белгиланган тартибда иш берувчи томонидан қопланиши билан боғлиқ талаблар ижроси таъминланмаётгани аниқланган.
Мисол учун, Сирдарё вилояти Янгиер шаҳар тиббиёт бирлашмаси реанимация бўлими мудири Баҳром Холматов 2017 йилнинг 1—28 июнь кунлари, кўп тармоқли марказий поликлиника дерматовенерологи Раҳматжон Жўраев 2017 йил 4—30 сентябрь кунлари, кардиология бўлими мудири Муҳибиллахон Умаров 2018 йил 31 январь—27 февраль кунлари Тошкент врачлар малакасини ошириш институтида малака оширган. Уларнинг ойлик иш ҳақи сақланиб қолган бўлса-да, ўқиш жойига бир марталик бориш ва қайтиш ҳамда яшаш харажатлари иш берувчи ҳисобидан қопланмаган.
Бундай ҳолатлар иш берувчи ва ходимлар, молия ва назорат органлари ўртасида ҳар хил талқин қилиниши ҳамда тушунмовчиликлар юзага келишига сабаб бўлмоқда.
Давра суҳбатида тиббиёт тизимидаги кадрлар етишмовчилиги муаммолари ва уни бартараф этишда Соғлиқни сақлаш вазирлигининг режалари ҳақида сўз юритилди. Маълумотларга кўра, жорий йил бошида турли мутахассисликлар бўйича 7 мингдан зиёд врач етишмаслиги аниқланган.
Айни пайтда 653 та умумий амалиёт шифокори етишмаяпти. Айниқса, Жиззах, Сурхондарё, Қашқадарё, Фарғона ва Тошкент вилоятларида умумий амалиёт шифокори етишмовчилиги кўрсаткичи юқори бўлиб турибди.
Изоҳ (0)