Ўзбекистоннинг Бутунжаҳон савдо ташкилотига кириши билан боғлиқ масалаларни ишлаб чиқиш доирасида Ташқи савдо вазирлигида БМТ Тараққиёт дастури ҳамкорлигида Жаҳон банки, Осиё тараққиёт банки, АҚШ халқаро тараққиёт агентлиги (USAID), Евроиттифоқнинг Ўзбекистондаги делегацияси, Германия халқаро ҳамкорлик жамияти (GIZ) ва бошқа халқаро ташкилотлар вакиллари билан учрашув ўтказилди. Бу ҳақда вазирлик матбуот хизмати маълум қилди.
«БСТга қўшилиш бир неча босқичдан иборат ва унга яқинда қўшилган мамлакатлар тажрибаси бу жараён бир неча йилга чўзилиши мумкинлигини кўрсатди. Бу ўтиш-тайёргарлик даврини Ўзбекистон мазкур ташкилотга аъзолик натижаларини таҳлил қилиш ва баҳолаш, ижобий жиҳатлар ва эҳтимолий хавфларни ҳисоб-китоб қилиш учун максимал даражада фойдаланади. Ўзбекистоннинг ташкилотга аъзо бўлишининг иқтисодиётга салбий таъсирини олдини олиш мақсадида иқтисодиётнинг айрим секторлари, ишлаб чиқарувчиларнинг турли гуруҳлари тайёрлиги даражаси ўрганиб чиқилади, маҳаллий корхоналар рақобатбардошлигини ошириш чоралари кўрилади», — деди Ташқи савдо вазири Жамшид Хўжаев.
Вазирга кўра, БСТга аъзо бўлиш жараёнида мамлакат мавқейини мустаҳкамлаш, иқтисодиётнинг тўқимачилик, қишлоқ хўжалиги, озиқ-овқат, автомобилсозлик каби соҳаларини ҳимоя қилиш мақсадида Ўзбекистон Президентининг божхона божлари ставкаларини кўриб чиқиш бўйича қарори лойиҳаси тайёрланмоқда. Вазирлар Маҳкамаси томонидан «Йўл харитаси» ишлаб чиқилган.
«Бутунжаҳон савдо ташкилоти фаолияти умумий товар оқими ҳажмининг 94 фоиздан ортиғини қамраб олади. Шу сабабли мазкур ташкилотга кириш Ўзбекистон ташқи иқтисодий сиёсатининг устувор йўналиши, мамлакат халқаро имиджини яхшилашнинг асосий омилларидан бири сифатида кўрилмоқда», — таъкидлади Жамшид Хўжаев.
Изоҳ (0)