«Ўзэкспомарказ» миллий кўргазмалар мажмуида «Қишлоқ хўжалиги – Agro World Uzbekistan – 2018» халқаро кўргазмаси иш бошлади. У ўн учинчи бор ташкил этилмоқда, деб хабар беради ЎзА.
16 мартга қадар давом этадиган нуфузли тадбир қишлоқ хўжалиги техникаси ишлаб чиқарувчилари, деҳқон ва фермерлар, тадбиркорлар, ҳамкор тармоқлар мутахассисларини ўзига хос инновацион майдонда бирлаштирди.
Унда Австрия, Озарбайжон, Беларусь, Бельгия, Германия, Италия, Испания, Қозоғистон, Хитой, Латвия, Жанубий Корея, Нидерландия, Россия, Туркия, Украина, Франция каби 20 га яқин мамлакатдан 100 дан ортиқ компания, маҳаллий қишлоқ хўжалиги вакиллари иштирок этмоқда.
Кўргазма очилишида Қишлоқ хўжалиги вазирлиги, Фермер, деҳқон хўжаликлари ва томорқа ер эгалари кенгаши, мамлакатимиздаги дипломатик корпус вакиллари, соҳага алоқадор ташкилотлар вакиллари қатнашди.
«Ўзэкспомарказ» павильонларида, шунингдек, очиқ майдонда намойишга қўйилган маҳаллий ва хориж мамлакатларининг қишлоқ хўжалиги маҳсулотларини қайта ишлаш ускуналари, паррандачилик ва чорвачилик учун доривор воситалар, иссиқхоналар учун замонавий технологиялар, тезпишар ва ҳосилдор экинлар уруғлари иштирокчиларда катта қизиқиш уйғотмоқда.
– Ўзбекистон учун қишлоқ хўжалиги соҳаси жуда муҳим ва аҳамиятли тармоқ. Мамлакатда бу соҳа жадал ривожланмоқда, — дейди Нидерландия элчиси Регина Вероника Мария Жонс-Бос. — Нидерландияда аграр тармоқ яхши ривожланган. Аминманки, ўзбекистонлик соҳа вакиллари билан бу борада тажриба алмашиб, самарали ҳамкорлик алоқаларини ўрнатамиз. Бугунги кўргазмада Нидерландиянинг 11 компанияси иштирок этмоқда. Кўргазма давомида ўзаро истиқболли шартномалар имзоланишига ишончимиз комил.
Инновацион ғояларни ҳаётга татбиқ этган Тошкентдаги «Ўзбиогаз» масъулияти чекланган жамияти кўргазмада фермер ва аҳоли учун органик чиқиндилардан биогаз оладиган ускунани намойиш этмоқда. Тақдим этилаётган ускуна ёрдамида 1 тонна органик чиқиндидан 60-70 метр/куб газ олиш мумкин. Шунингдек, қолган ўғит ерга ташланса, 30-40 фоизгача ҳосилдорлик ошади. Аҳолига, тадбиркорларга қулайлик яратиш мақсадида ускунани 10 йил муддатга ҳеч қандай кафилликсиз лизингга ўрнатиб бериш йўлга қўйилди.
Кўргазма нуфузи йил сайин ортиб бормоқда. Бу иштирокчилар сони кўпайганида ҳам кўзга ташланади. Бу йил кўргазмага илк бор Татаристоннинг 5 компанияси вакиллари ташриф буюрди.
Анъанага кўра, кўргазманинг иккинчи кунида Ўзбекистон фермер, деҳқон хўжаликлари ва томорқа ер эгалари кенгаши кўмагида «Фермерлар куни» бўлиб ўтади. Унда иштирокчилар ўзаро тажриба алмашади, соҳага доир янги техника ва технологиялар билан танишиш имконига эга бўлади.
Изоҳ (0)