2017 йилда виртуал қабулхона ва Халқ қабулхоналарига жисмоний ва юридик шахслардан 1,4 миллиондан ортиқ мурожаат келиб тушди. Ҳар бир ариза ва шикоятнинг қонун доирасида кўриб чиқилиши қатъий назоратга олинди, деб хабар беради ЎзА.
1 миллион 338 мингта мурожаат мазмунан ҳал этилиб, уларнинг 919 мингдан ортиғи (66,5 фоиз) қаноатлантирилди, 418 мингдан ортиғи (30 фоиз) бўйича ҳуқуқий тушунтиришлар берилди.
2017 йилда мурожаатлар билан ишлаш тизимининг қонунчилик асосларини янада мустаҳкамлаш мақсадида «Жисмоний ва юридик шахсларнинг мурожаатлари тўғрисида»ги қонун янги таҳрирда қабул қилинди. Ўзбекистон Республикаси Президентининг виртуал қабулхонаси дастурининг қўшимча қулайликларга эга янги версияси ишлаб чиқилди.
Мурожаатларни кўриб чиқиш жараёнида аниқланган муаммолар юзасидан 98 та ахборот-таҳлилий материаллар тайёрланиб, улар асосида тегишли норматив-ҳуқуқий ҳужжатлар лойиҳаларини ишлаб чиқиш ҳамда чора-тадбирлар белгилаш назарда тутилди.
Аҳолининг истак-хоҳишлари ва таклифлари асосида кўплаб ҳаётий муҳим масалаларда 50 дан ортиқ фармон ва қарорлар қабул қилинди. Хусусан, арзон уй-жойлар қуриш, ичимлик суви, иссиқлик таъминоти ва канализация тизимларини яхшилаш, йўлларни таъмирлаш, маҳсулот ва хизматларни тўлиқ миллий валютада сотишга ўтиш, аҳолига тиббий ёрдам кўрсатиш, пенсияларни нақд пулда бериш каби масалаларда ҳуқуқий ҳужжатлар ишлаб чиқилди.
Кўрилган амалий чоралар натижасида фуқаролик паспортини расмийлаштириш юзасидан мурожаатлар 2 баробар, таълим соҳасида 1,8, уй-жой билан таъминлашда 1,6, амнистия масалаларида 1,5, даволаниш учун моддий ёрдам бериш борасида 1,4 баробарга камайди.
Ўрта ҳисобда ойлик мурожаатлар 2017- йилнинг охирида 30 фоизга пасайди.
2017 йилда мурожаатларнинг ҳудудлар кесимидаги таҳлили шуни кўрсатмоқдаки, энг кўп шикоят ва аризалар Тошкент шаҳри (265 141 та) аҳолисидан олинган.
Шунингдек, Тошкент вилоятидан 159 987, Фарғона вилоятидан 142 708, Қашқадарё вилоятидан 151 847, Андижон вилоятидан 116 787, Сурхондарё вилоятидан 112 010, Самарқанд вилоятидан 93 626, Наманган вилоятидан 72 185, Бухоро вилоятидан 71 018, Навоий вилоятидан 59 507, Хоразм вилоятидан 52 843, Жиззах вилоятидан 52 278, Қорақалпоғистон Республикасидан 45 152 ва Сирдарё вилоятидан 44 286 мурожаат келиб тушган.
Изоҳ (0)