Британиялик актёр, сценарист ва телебошловчи Кен Додд вафот этди

Буюк Британияда актёр, сценарист ва телебошловчи Кен Додд 90 ёшида вафот этди. Бу ҳақда Daily Mail хабар бермоқда.

Додд Ливерпулдаги уйида вафот этди. Икки ҳафтача аввал унга шифохонадан жавоб беришган эди. У ўпканинг жиддий инфекциясига қарши даволанган. Ўлимидан икки кун аввал комик 40 йилдан ортиқ бирга яшаган Анна Жонс билан расман турмуш қуришга улгурган.

Кен Додд ўзининг стендап-шоулари билан машҳур бўлган. Уларнинг услуби нафақат комедиялар, балки қўшиқлар ва саҳна томошаларини ҳам ўз ичига олган. 1960 йилларда Додд ҳазилларга бой юмористик шоу ўтказиб, Гиннеснинг Рекордлар китобига кирган. Комикнинг телевидениеда The Ken Dodd Show, Doddy’s Music Box, Ken Dodd and the Diddymen ва бошқа шоулари бўлган.