КХДР етакчиси Ким Чен Ин АҚШ билан тинчлик битимини тузишга ва дипломатик алоқалар ўрнатишга интилмоқда. Бу ҳақда 12 март, душанба куни Жанубий Кореянинг Tona Ilbo газетаси мамлакат раҳбари маъмуриятидаги манбасига таяниб хабар берди, деб ёзади «ТАСС».
«Ким Чен Иннинг пировард мақсади — АҚШ билан нормал дипломатик муносабатлар ўрнатиш ва тинчлик битимини тузиш, шунингдек, Пхеньянга Америка элчихонасини жойлаштириш», — деди нашр манбаси. Унинг аниқлик киритишича, бу нияти ҳақида КХДР етакчиси яқинда Жанубий Корея делегацияси билан бўлиб ўтган учрашувда айтиб ўтган. Шунингдек, Дональд Трамп билан учрашувда Ким Чен Ин Корея ярим оролини қуролсизлантириш масаласини ҳам кўтариши мумкин, деди манба.
Эслатиб ўтамиз, КХДР етакчиси Ким Чен Ин Жанубий Корея делегацияси орқали АҚШ президенти Дональд Трампга яқин вақтлар ичида учрашув ўтказишни таклиф қилди. Трамп ушбу учрашувни шу йилнинг майигача ўтказишга тайёрлигини маълум қилди.
Жанубий Корея ҳукуматидаги манбаларга кўра, АҚШ президенти Дональд Трамп ва КХДР етакчиси Ким Чен Иннинг учрашуви Пхеньянда бўлиб ўтади.
Изоҳ (0)