Самарқанд шаҳридаги «Сўғдиёна» истироҳат боғини замований дам олиш масканига айлантириш учун кенг кўламли қурилиш-бунёдкорлик ишлари амалга оширилмоқда, деб хабар берди ЎзА.
Шаҳар ҳокими Фурқат Раҳимовнинг айтишича, вилоят ҳокимининг жорий йил 23 февралдаги қарорига кўра, ушбу боғ ўрнида замонавий инновацион истироҳат боғи ташкил этилади. 6,3 гектар майдонни эгаллаган ҳудудда картинг клуби, муз устида учиш бўйича «Муз саройи», сайёҳлар учун замонавий меҳмонхона, ресторан ва бошқа кўнгилочар масканлар бунёд этилади. Янги аттракцион ва ўйин қурилмалари ўрнатилади.
«Янги боғ лойиҳаси асосида айни пайтда ҳудуддаги эски бинолар бузилиб, янги объектларнинг қурилиш ишларига киришилмоқда. Мавжуд аттракцион ва бошқа воситалар шаҳардаги истироҳат боғларига кўчириляпти. Инновацион боғни бунёд этишда ҳар томонлама қулай қурилиш материаллари, замонавий технологиялардан фойдаланилади. Самарқандда илк бор қурилаётган муз саройини ҳам халқаро стандартларга мос лойиҳа бўйича яратиш режалаштирилган», — дейди лойиҳа ташкилотчиси – Family Park МЧЖ масъул ходими Х.Пўлатов.
Жорий йилнинг сентябрь ойига қадар фойдаланишга топширилиши кўзда тутилган объект нафақат маҳаллий аҳоли, балки Самарқандга келадиган хорижлик сайёҳлар учун муҳим туристик маскан бўлади.
Шунингдек, эски боғ ҳудудидаги сунъий сув ҳавзаси ўрнида ҳам бугунги кунда замонавий аквапарк қурилиши жадал олиб борилмоқда.
«3,5 гектар майдонни эгаллаган ҳудудда 200 ўринли меҳмонхона, қишки спорт-соғломлаштириш маркази, болалар, ўсмирлар ва катталарга мўлжалланган чўмилиш ҳавзалари, кафе ва бошқа кўнгилочар масканлар бунёд этилмоқда. Чўмилиш ҳавзаларини қуриш ва жиҳозлашда хитойлик ҳамкасбларимиз тажрибасидан самарали фойдаланаяпмиз. Умуман лойиҳага кўра, бу ерда дам олувчилар учун энг замонавий шароит ва имкониятлар яратилади. Ўтган йил июль ойида бошланган қурилиш ишларининг дастлабки босқичини жорий йилнинг июнь ойигача якунлаш кўзда тутилган», — дейди «Самарқанд Добусия акваленд» МЧЖ раҳбари Б.Ибрагимов.
Изоҳ (0)