Ўзбекистонда қаттиқ маиший чиқиндиларни саралаб жамлаш тизимига ўтилади

Ўзбекистонда қаттиқ маиший чиқиндиларни саралаб жамлаш тизимига ўтилади. Бу ҳақда «Халқ сўзи» хабар бермоқда.

Бу борада қабул қилинган қарорга мувофиқ икки ой мобайнида 2018—2021 йилларда маиший чиқиндиларни саралаб жамлаш тизимини ишга тушириш бўйича «йўл харитаси», 2018 йилнинг 1 ноябридан эса қаттиқ чиқиндиларни бошқариш борасида Миллий стратегия лойиҳаси тайёрланиши кўзда тутилмоқда.

Қайд этилишича, Ўзбекистонда чиқиндиларни қайта ишлаш инфратузилмаси яратилмоқда. Охирги бир ярим йил ичида 9 та шаҳарда 1,2 миллион тоннадан ортиқ чиқиндиларни жамлаш, саралаш, ташиб чиқиш, утилизация қилиш ва қайта ишлаш бўйича кластерлар ишга туширилди.

Шунингдек, республикада 13 та «Тоза ҳудуд» ҳудудий унитар корхонаси ва уларнинг 174 та филиали ташкил қилиниб, керакли махсус техника билан таъминланди. Натижада аҳолига санитар тозалаш хизматлари кўрсатиш ҳажми 10 баравар ошди.

Аҳоли пунктларида 322 та янги турдаги чиқиндиларни қайта ишлаш заводи қурилди. Чиқинди жамлаш пунктлари 2652 та замонавий контейнер билан таъминланди, 97 та қаттиқ маиший чиқинди полигони жиҳозланди.

Қаттиқ маиший чиқиндиларни саралаб жамлаш тизими турли рангдаги чиқинди контейнерларини ўрнатишни талаб қилади. Мазкур тизимни Тошкент шаҳрида 2012 йилдан бошлаб ишга тушириш мўлжалланганди, бироқ режа ҳозиргача амалга оширилмади.