Лола Каримова-Тиллаева Facebook’даги саҳифасига Лос-Анжелесда Сэр Элтон Жоннинг ОИТСга қарши кураш Фонди томонидан ташкил этилган хайрия кечасида турмуш ўртоғи билан тушган суратини жойлади ва Ўзбекистон гимнастика федерацияси Президентлиги лавозимини тарк этаётганини маълум қилди.
«Мен ушбу пост орқали, мана 13 йиллик фаолиятимдан сўнг, Ўзбекистон гимнастика федерацияси Президентлиги лавозимини тарк этишга мажбур эканлигимни эълон қилмоқчиман. Мен барча спортчиларимиз, федерациянинг бутун мураббийлар жамоаси ҳамда барча ишчи ходимларига аъло бажарилган фаолиятлари, ушбу спорт турини юқори даражага кўтаришдаги ҳиссалари, унинг ривожланиш йўлидаги тинимсиз меҳнатлари ҳамда ғайратлари учун чин дилимдан ташаккур билдирмоқчиман. Осиё Гимнастика Иттифоқининг фахрий Президенти лавозимини сақлаб қолган ҳолда, мен ушбу ажойиб спорт турининг ашаддий муҳлисларидан бўлиб қоламан ҳамда бизнинг ўзбек гимнастларимизга келгуси фаолиятларида омад ва ғалабалар тилайман!» — деб ёзди у.
Аввалроқ Лола Каримова-Тиллаева Ўзбекистоннинг ЮНЕСКОдаги элчиси сифатидаги фаолиятини якунлаганини маълум қилган эди.
Изоҳ (0)