Қўқонда шаҳар мусиқали драма театри, «Буюк алломалар музейи» ва театр, санъат ва маданият ходимлари учун янги уй-жой биносини ўз ичига олган мажмуа барпо этилди. Бу ҳақда ЎзА хабар берди.
Театр биноси тубдан янгиланди. Актёрлар ишлаши, дам олиши, спектаклларга тайёргарлик кўришлари учун барча қулайликлар, шароитлар яратилди. Бу эса жамоага кўтаринки кайфият бағишлаб уларни янада яхшироқ ижод қилишга, томошабин учун энг сара образларни жонлантиришга ундамоқда. Театр жамоасига Isuzu автобуси совға қилингани ва Nexia 3 хизмат автомашинаси берилгани жамоани янада руҳлантирди, олис ҳудудлардаги мухлисларига ҳам ижод намуналарини ҳадя этиш имкони туғилди.
Театр рўпарасидаги Янги чорсу кўчасида 3 қаватли 36 хонадондан иборат янги уй-жой биноси қуриб битказилди ва имтиёзли кредит асосида театр, санъат ва маданият ходимларига берилди. Ўзбекистон халқ артисти Шафоат ая Раҳматуллаевага ҳам янги уйнинг иккинчи қаватидан икки хонали хонадон Президент совғаси сифатида берилди.
Мажмуадан ўрин олган «Буюк алломалар музейи» ҳам миллий қадриятлар, миллий маънавиятнинг энг ноёб бойликларини ўзида жамлаган. Музейнинг илмий концепцияси янгидан ишлаб чиқилди ва унинг асосида тематик экспозиция режаси тузилди ва экспозиция ишлари бошлаб юборилди.
— Бу ерни давлат раҳбари таклифи билан «Буюк алломалар музейи» деб номладик, — дейди музей директори Р. Зияев. — Музейда ўрта асрлар, Темурийлар даври, Қўқон хонлиги ва мустамлакага қадар яшаб ижод этган алломаларга оид экспонатлар, асарлар, суратлар йиғилмоқда. Бу ерга ташриф буюрувчилар буюк аждодлар ҳаёти, босиб ўтган йўллари, ижод маҳсуллари ҳақида тўлақонли маълумот олади. Буюмлар, турли идишлар эса ўша давр турмуш тарзидан дарак беради.
Изоҳ (0)