Бугун, 5 март куни Алишер Навоий номидаги Тошкент давлат ўзбек тили ва адабиёти университетида дунёнинг энг йирик тўрт илмий нашриёт уйларидан бири Elsevier’нинг Марказий Осиё минтақаси бўйича директори Алия Оспанова университет педагог ходимлари, докторант, магистрант ва талабалари учун семинар-тренинг ўтказди. Бу ҳақда университет ахборот хизмати маълум қилмоқда.
Семинарда дунёнинг машҳур илмий маълумотлар базаси ҳисобланган Scopus тизими ва ундан фойдаланишнинг имкониятлари ҳақида батафсил маълумот берилди. Импакт-фактори юқори бўлган хорижий журналларда илмий мақола эълон қилишнинг талаблари ва бу нашрларнинг афзалликлари тўғрисида тушунча берилди.
Олий таълим муассасасининг халқаро мақомга эга бўлиши ва халқаро рейтингларга киришида Scopus базасида эълон қилинадиган илмий нашрлардаги мақолаларнинг сони ва салмоғи катта аҳамият касб этиши алоҳида таъкидланди. Яқин фурсатларда Алишер Навоий номидаги ТошДЎТАУга ScienceDirect базасидаги маълумотлардан ҳам бепул фойдаланиш имконияти тақдим этилиши маълум қилинди.
Семинар сўнгида университет ва Elsevier нашриёт уйи ўртасида ўзаро ҳамкорликни йўлга қўйишга келишиб олинди.
Изоҳ (0)