Ўзбекистон Мудофаа вазирлиги Маънавият ва маърифат маркази ҳузурида илк бор ҳарбий театр-студияси — «Турон» ташкил этилди. Бу ҳақда Мудофаа вазирлиги матбуот хизмати хабар берди.
Маълумот учун, Ўзбекистондаги илк театр труппаси 1913 йилда Абдулла Авлоний бадиий раҳбарлиги остида Тошкентда очилган бўлиб, унинг номи ҳам «Турон» бўлган.
Мудофаа вазирлиги қошида ташкил этилган мазкур театр студияси нафақар ҳарбийлар ва уларнинг оиласига, балки барча фуқаролар учун бирдек хизмат кўрсатади. 100—120 кишига маданий ҳордиқ улашувчи «Турон» театри таркибидан Ўзбекистонда хизмат кўрсатган актёрлар Саида Раметова ва Карим Мирходиев, таниқли кино ва театр актёри, режиссёр Сайфиддин Мелиев, Феруза Собитова, Эльмира Раҳимжонова каби ўзбек халқининг севимли ижодкорлари жой олган.
«Турон» театри ўзининг илк премьерасини 8 мартдан кейин «Жалолиддин Мангуберди» спектакли орқали очишни режалаштирмоқда. Бундан ташқари айнан шу спектакл билан театр актёрлари Ўзбекистон бўйлаб гастрол сафарларини уюштиради. Шу билан бирга, театр рэпертуаридан «Бибихоним», «Тўмарис», «Бир кунлик бахт» сингари спектакллар ҳам ўрин олган.
Гастрол сафарлари рўйхати:
- 14—19 май кунлари — Шарқий ҳарбий округ (Андижон, Наманган, Фарғона вилоятлари);
- 28 майдан 2 июнгача — Шимоли-ғарбий ҳарбий округ (Қорақалпоғистон Республикаси, Хоразм вилояти);
- 11—16 июнь — Марказий ҳарбий округ (Самарқанд, Жиззах, Навоий вилоятлари);
- 25 июндан 20 июлга қадар —Жануби-ғарбий махсус ҳарбий округи (Бухоро, Қашқадарё ва Сурхондарё вилоятлари)да жойлашган Мудофаа вазирлиги ҳарбий қисм ва муассасаларда бўлиб ўтади.
Изоҳ (0)