Тошкентда Осиё давлатлари ёш томошабинлар театрлари вакилларининг учрашуви ўтказилади

Япония пойтахтида Осиё ёш томошабинлар театрлари ходимларининг учрашуви бўлиб ўтди. Унда 17 мамлакатдан 38 нафар вакил иштирок этди, деб ёзади ЎзА.

Осиё ёш томошабинлар театрлари фестивали доирасида ташкил этилган мазкур тадбир болалар ва ёшларга мўлжалланган театрлар ишини ташкил этиш ва такомиллаштириш бўйича тажриба алмашиш имконини берди. Иштирокчилар ўз театри фаолияти, ютуқ ва режаларини баён этди.

Ушбу учрашув «AССИТTEЖ» болалар ва ёшлар театрлари арбоблари халқаро ассоциацияси кўмагида ўтказилди. Мазкур ташкилот дунёнинг кўплаб мамлакатларидаги театр ва санъат арбобларини бирлаштиради.

– Бу учрашувда иштирок этишдан асосий мақсадимиз жаҳон болалар театрлари сафига қўшилиш эди, – дейди Ўзбекистон давлат ёш томошабинлар театри режиссёри ёрдамчиси Сардор Ғозиев. – Биз Ўзбекистонда театрга давлат томонидан катта эътибор қаратилиши ҳақида батафсил сўзлаб бердик. Фикрларимиз ҳамкасбларимизда катта таассурот уйғотди. Айримлар юртимизда театр соҳасида амалга оширилаётган ислоҳотларни ўз кўзи билан кўриш истагини билдирди. Биз Жанубий Корея, Япония, Хитой, Грузия, Ҳиндистон театрлари спектаклларини томоша қилдик. Бу ижро ва мавзуларни таққослашга кенг йўл очди. Миллий қадриятлар ва жаҳондаги ўзгаришларга монанд мавзулар театримиз репертуаридан жой олгани ва тўғри йўналтирилганига яна бир бор амин бўлдик.

Токиодаги учрашув Ўзбекистон давлат ёш томошабинлар театри учун муваффақият келтирди – муассаса энди «AССИTEЖ»нинг Ўзбекистондаги вакили сифатида халқаро тадбирларда қатнашиш ҳуқуқига эга бўлди. Жумладан, унинг вакиллари Хитой, Грузия, Дания ва Ҳиндистонда ўтказиладиган ёш томошабинлар театрлари фестивалларида иштирок этади.

Учрашувда 2019 йили Осиё давлатлари ёш томошабинлар театрлари учрашувини Тошкентда ўтказиш таклифи киритилди ва маъқулланди.