1 март куни соат тонгги 04:29 да Олмалиқ шаҳар ёнғин хавфсизлиги бўлимига Ҳ.Олимжон кўчасидаги 24-уй 50-хонадон ёнаётгани ҳақида хабар келиб тушган, деб хабар беради Олмалиқ шаҳар ёнғин хавфсизлиги бўлими матбуот хизмати.
Шаҳар ёнғин хавфсизлиги бўлими навбатчи бўлинмалари соат 04:37 да ёнғин жойига етиб борди. Бўлинмалар ҳодиса жойига етиб борган пайтда хонадон ичи тутаб ёнаётган эди. Хонадон ичида уй эгаси 1985 йилда туғилган Артём Асанов қолиб кетганлиги аниқланди. У зудлик билан ўт ўчирувчилар томонидан ташқарига олиб чиқилган. Ёнғин вақтида кўп қаватли уйнинг подездлари қуюқ тутун билан қоплангани учун шу подездда яшовчи яна беш киши хавфсиз жойга эвакуация қилинган.
Ёнғин хонадон эгаси Артём Асановнинг маст ҳолда сигарет чекиб ухлаб қолгани туфайли юз берганлиги аниқланди. Ёнғин оқибатида хонадоннинг олти метр квадрат майдонида уй жиҳозлари зарарланган, 63 метр квадрат майдони сақлаб қолинган.
Ҳодиса юзасидан Олмалиқ шаҳар ЁХБ томонидан суриштирув ишлари олиб борилмоқда.
Изоҳ (0)