Ўзбекистон Президенти Шавкат Мирзиёев раислигида 27 февраль куни экспортни кўпайтириш ва импортни қисқартиришга бағишланган видеоселектор йиғилиши бўлиб ўтди. «Ўзбекистон 24» телеканалининг «Ахборот 24» дастурида йиғилишдан репортаж намойиш этилди.
Президент йиғилишда экспортчилар учун барча шароитлар яратиб берилишини таъкидлаган.
Биз экспорт билан импортни ҳисоб-китоб қилишни ўрганмаганмиз. Олиб келган одам олиб келаверган, ким қўл қўйса қўл қўяверган. Бозор топиш азоб деб бекорга айтмаяпман. Бозорни ким топади? Рақобатбардош маҳсулот ишлаб чиқарган давлат, конъюктура қанчалар оғир бўлмасин, сифатли маҳсулот билан албатта ўз бозорини топади.Президент матбуот хизматидан маълум қилишларича, энди экспортни ташкил этиш ва мониторинг қилишга бош вазир ўринбосари Нодир Отажонов ва бош прокурорнинг биринчи ўринбосари Эркабой Тожиев раҳбарлигидаги гуруҳ жавоб беради. Жойларда экспорт билан шахсан вилоят ҳокими ва вилоят прокурорларининг биринчи ўринбосарлари шуғулланади.Агар экспорт билан импортни ҳар куни ҳисоб-китоб қилмас эканмиз, биз ҳозир қўйган вазифаларимизни ҳеч қачон уддалай олмаймиз. Бугундан бошлаб экспорт кўпайтириш, пировардида импортни қисқартириш бўйича қўйилган вазифалар ижроси, бу борада тармоқлар ва ҳудудлардаги ишларнинг ҳаққоний ҳолатини танқидий кўриб чиқишимиз шарт. Агар биз шуни ўзимиз танқидий кўриб чиқмас эканмиз, биз учун ҳеч ким қилиб бермайди.
Энди бу борадаги ишларни ташкил этиш ва назорат қилишнинг бутунлай янги тизими жорий этилади. Пахта кластери қилганимиздек, экспорт ташкил қилувчи кластер тузамиз. Унга ҳамма шароитларни яратиб берамиз. Вилоятлар иқтисодиётининг рақобатбардошлиги экспортни кўпайтириб, импортни камайтириш билан боғлиқ бўлади. Экспортни кўпайтирмасак, экспорт билан ҳар куни шуғулланмасак, иқтисодиётимиз рақобатбардош бўлмайди.
Шавкат Мирзиёев, Ўзбекистон Президенти
Импортни қисқартириш ишларини ташкил этиш ва мониторинг қилиш бўйича республика Ишчи гуруҳи ҳам тузилиб, унга Бош прокуратура ҳузуридаги Солиқ, валютага оид жиноятларга ва жиноий даромадларни легаллаштиришга қарши курашиш департаменти бошлиғи раҳбар этиб белгиланди. Худди шундай ишчи гуруҳлар ҳудудларда ҳам ташкил этилади ва уларга ҳудудий департамент бошлиқлари раҳбарлик қилади.
Департаментнинг вазифалари бугунги кун талаблари, импорт ва экспорт масалаларини тартибга солиш нуқтаи назаридан тубдан ўзгартирилади. Департамент Ўзбекистондан валюта мақсадсиз чиқиб кетишининг олдини олиш, импортни қисқартириш, унинг ўрнини босадиган маҳаллий маҳсулот ишлаб чиқаришни қўллаб-қувватлаш бўйича тизимли ишларни ташкил этиши зарурлиги таъкидланди.
Бу ишчи гуруҳлар жойларда ҳар бир тадбиркор билан учрашиб, уларга экспорт ҳажмини ошириши учун реал ёрдам бериши, маҳсулот экспорт қилаётганларга «яшил коридор» қилиб бериши лозим. Шу билан бирга, импортни мунтазам таҳлил қилиб, маҳаллий ишлаб чиқаришни ривожлантириш бўйича аниқ лойиҳаларни амалга оширишга ҳар томонлама кўмак беришлари зарур. Вазирлар ва тармоқлар раҳбарлари ҳам ўз фаолиятини худди шу тартибда ташкил этади.Экспорт ва импорт бўйича қилинаётган ишлар бош вазир ҳамда бош прокурор раҳбарлигида ҳафтада икки марта муҳокама қилинади. Масалан, туманлардаги Ишчи гуруҳлар фермерлар ва аҳоли томорқаларида сердаромад мева-сабзавот экинлари экиш, уларни уруғлик, маблағ, ўғит, ёқилғи билан таъминлаш ишларини ташкил этишга кўмаклашади. Ҳар бир туманда мева-сабзавотни экспорт қилувчи корхона ташкил этиш ҳам бу борадаги муҳим вазифа ҳисобланади.Шавкат Мирзиёев, Ўзбекистон Президенти
Изоҳ (0)