Сирдарё вилоятининг Тожикистон билан чагарадош бўлган энг чекка ҳудудида жойлашган Ховособод маҳалласини (Ховос тумани) 2018 йилдан ижтимоий-иқтисодий комплекс ривожлантириш бўйича йўл харитаси ишлаб чиқилди, деб хабар берди Сирдарё вилояти ҳокимлиги матбуот хизмати.
Ушбу маҳаллада 2560 нафар аҳоли истиқомат қилади. Маҳалланинг ички йўллар, кўп қаватли уйлар, маданий-маиший иншоотлар таъмирталаб, ичимлик суви, табиий газ ва электр энергияси таъминотида ҳам қатор муаммолар мавжуд.
Мазкур масалаларни тезкорлик билан ҳал қилиш мақсадида ишчи гуруҳдан иборат вилоят штаби ташкил этилди. Биринчи галда аҳолининг бандлигини таъминлаш масаласига эътибор қаратилди. Унга биноан 98 нафар ишга муҳтож аҳоли темир йўл корхоналари ҳамда Янгиер шаҳридаги темир бетон ишлаб чиқарувчи заводга ишга жойлаштирилди. Айни кунларда мавжуд 12 та кўп қаватли уйларнинг том қисми ҳамда ташқи кўриниши, йўлаклар, ҳудуддаги тунги ёритгич чироқларини таъмирлаш, ноқонуний қурилишлар ўрнида болалар майдончалари, ўчоқ ва тандирхоналар бунёд этиш, 26 километр йўлга асфальт ва шағал ташлаш ишларига жадал киришилди.
Аҳолини электр энергияси билан таъминлайдиган беш дона трансформатор ўрнатилди. Икки ярим километр масофадаги ичимлик суви таъминоти яхшиланди. 485 та хонадон эгалари ихтиёрида бўлган 36 гектар томорқада иссиқхоналар ташкил этиш орқали аҳолини доимий даромад манбаси сифатида таъминлаш масаласи алоҳида эътиборга олинди. Шу мақсадда оқава сув таъминотини меъёрига етказиш учун 7 та артезан қудуқларида капитал таъмирлаш ишлари олиб борилмоқда.
Ўз навбатида маҳаллада тадбиркорлик, оилавий бизнесни ривожлантириш бўйича ҳам манзилли дастурлар асосида аҳолига имтиёзли кредитлар ажратиши белгилаб олинди. Бўш турган бинолар имкониятларидан унумли фойдаланиш мақсадида тикувчилик, паррандачилик, чорвачилик, 100 ўринли хусусий мактабгача таълим муассасаси, озиқ-овқат маҳсулотлари билан савдо қилувчи кичик бозор фаолияти йўлга қўйиш ишлари бошланди.
Изоҳ (0)